भैरहवा । काठमाडौंको बालुवाटारबाट सुरु भएको सरकार विरोधी प्रदर्शन देशव्यापी बन्न थालेको छ ।
रुपन्देहीको बुटवल र भैरहवामा युवाहरु सरकारले भ्रष्टाचार गरेको भन्दै युवाले प्रदर्शन गरेका छन् । भैरहवाका प्रदर्शनकारीले प्रमुख जिल्ला अधिकारीलाई ज्ञापनपत्र बुझाएका छन् ।
युवाहरुले नेपाल सरकारले बिश्वमा महामारीका रुपमा फैलिएको कोरोना भाइरसको टेष्टमा १० अर्ब खर्च कसरी भयो त्यसको हिसाब सार्बजनिक गर्नुपर्ने र त्यसको निश्पक्ष छानबिन हुनुपर्ने माग गरे ।
प्रधानमन्त्री केपी शर्मा ओलीले संसदमा १० अर्बको विषयलाई समेत सम्बोधन गर्दै संकटको समयमा कोही कसैले भ्रष्टाचार गरे कडा कारवाही गर्ने प्रतिवद्धता जनाएका थिए ।
प्रदर्शनकारी युवाले कोरोना भाइरको परीक्षणको क्रममा आरडीटी विश्वसननीयता नभएको हुनाले तथा अनावश्यक खर्च गर्नु भन्दा यसलाई बन्द गरि पिसीआर बिधिबाट कोरोना परिक्षण गर्नुपर्ने बताए ।
अग्रपंतिमा खटिएका स्वास्थ्यकर्मीहरुको स्वास्थ्य सुरक्षा तथा स्वाभिमानको सुनिश्चितता गर्नुपर्ने युवाहरुले बताए ।
विभिन्न पालिकाहरुले निर्माण गरेका क्वारेन्टाइनहरु डब्लुएचओको मापदण्ड अनुसार हुनुपर्ने उनीहरुको माग छ ।
भैरहवाको बुद्धचोकबाट शान्तिपूर्ण आन्दोलन सुरु भई बिद्रोही चोक, मिलन चोक, नारायणस्थान हुँदै जिल्ला प्रशासन कार्यालयमा पुगेर युवाहरुले प्रमुख जिल्ला अधिकारी माहादेव पन्थलाई ज्ञापन पत्र बुझाएका थिए ।
लकडाउनका बीचमा आफै सामाजिक दूरी कायम गर्नुपर्ने दायित्व पुरा गर्नुपर्ने बेलामा यसरी सडकमा मानिसहरु किन उत्रिएका छन् भन्ने बारेमा सरकार गम्भीर बन्नुपर्छ ।
सडकमा देखिएको आक्रोश र यसको परिचालनबारे गम्भीरतापूर्वक ध्यान दिएन भने एकातिर कोरोना भाइरस अनियन्त्रित बन्ने छ भने अर्कोतिर सरकारको विश्वसनीयतामाथि नै संकट उत्पन्न हुनेदेखिन्छ ।
प्रतिक्रिया