मुख्यमन्त्री गिरीले गरे संसद विघटनको प्रतिरक्षा

बुटवल । एमाले अध्यक्ष केपी ओलीले गरेको संसद विघटनको बिरोध गरेका दलहरुको समर्थनमा मुख्यमन्त्री बनेका लुम्बिनी प्रदेशका मुख्यमन्त्री लिला गिरीले केपी ओलीले गरेको संसद विघटनको प्रतिरक्षा गरेका छन् । प्रेस चौतारी नेपाल लुम्बिनी प्रदेश कमिटी बैठकलाई शनिबार दाङमा संवोधन गर्दै मुख्यमन्त्री गिरीले अध्यक्ष ओलीले संसद विघटन गरेर मुलुकलाई संकटमा जानबाट जोगाएको बताए ।

२०७७ पुस ५ मा तत्कालीन प्रधानमन्त्री ओलीले सँसद विघटन नगरेको भए ओली सडकमा आउने अवस्था रहेको बताउँदै मुख्यमन्त्री गिरीले संसद विघटन गरेर ओलीले मुलुकलाई संकटमा जानबाट जोगाएको टिप्पणी गरे ।

उनले अध्यक्ष ओलीलाई मुलुकको सर्वाधिक लोकप्रिय नेता भएको पनि दाबी गरे । मुलुकको अहिलेको राजनीतिक नेतृत्वमा केपी ओली नै जनतामा सर्वाधिक लोकप्रिय नेता भएको उनले बताए ।

उनले देशको स्थायी राजधानी देउखुरीमा अब स्थायी संरचना निर्माणको कामलाई तीव्रता दिइने बताए।

समग्र प्रदेश सरकार सफल भयो भने सिंगो मुलुक नै सफल हुने र नागरिकको जीवनस्तर माथि उठ्ने भन्दै मुख्यमन्त्री गिरीले यसको लागि सन्चार जगतको सहयोग अपरिहार्य हुने धारणा राखे ।