प्रदेश ५ मा पहिलो विशिष्टिकृत सहकारी स्थापना

बुटवल । प्रदेश नम्बर ५ मा पहिलो प्रदेश स्तरको सहकारी संस्थाले बैधानीकता पाएको छ । संशोधित सहकारी ऐन अनुसार नेपालको दोस्रो र प्रदेशको पहिलो विशिष्टिकृत सहकारी संघको रूपमा लुम्बिनी विशिष्टिकृत सहकारी संघ लिमिटेडले मान्यता पाएको छ ।

प्रदेश ५ भुमि ब्यवस्था तथा सहकारी मन्त्रालयमा आयोजित कार्यक्रममा लुम्बिनी बिशिष्टिकृत सहकारी संस्थालाई प्रदेशको पहिलो बिशिष्टिकृत सहकारीकारुपमा कृषि तथा सहकारी मन्त्री आरती पौडेलले प्रमाणपत्र प्रदान गरेकी थिईन् ।

प्रमाणपत्र बितरण गर्ने कार्यक्रममा बोल्दै मन्त्री पौडेलले एकलागि सबै, सबैका लागि एक भन्ने सहकारीको मुलमन्त्रलाई आत्मसाथ गर्दै प्रदेशमा उत्कृष्ठ काम गर्ने सहकारी बन्न शुभकामना दिईन् । उनले नयां परिवेशमा नयां कामको थालनि भएकाले सिक्दै र परिस्कृत हुंदै जानेगरि काम गर्न आवश्यक रहेको बताईन् ।

प्रदेश नम्बर ५ का १०वटा जिल्ला कार्यक्षेत्र रहनेगरी विभिन्न प्रकृतिका ५१ वटा प्रारम्भिक सहकारी संस्थाहरुको संलग्नता एवं प्रारम्भिक लगानीमा विशिष्टिकृत सहकारी संघ लिमिटेड स्थापना भएको हो । सहकारीले उच्चस्तरको प्रशोधन प्रविधिको प्रयोग गरी दूधलाई प्रशोधन गरेर गुणस्तरीय दूध आपूर्ति गर्ने तथा दूधका अन्य विभिन्न परिकारहरु समेत तयार गरी बजारमा लैजाने लक्ष्य लिएको छ ।

कार्यक्रममा बोल्दै संस्थाका अध्यक्षखगराज शर्माले प्रदेश अन्तर्गतका रुपन्देही सहित विभिन्न जिल्लामा रहेका दुग्ध उत्पादन सहकारीका अलावा अन्य विभिन्न प्रकृतिका सहकारी संस्थाहरुलाई आवद्ध गरी आवश्यक पुँजी जुटाउने तथा आम सहकारीहरूलाई पुन थप अपनत्व दिलाउने कामको थालनी गर्ने प्रतिबद्धता ब्यक्त गरे । सहकारीले डेढ देखि, दुई वर्ष भित्रमा उत्पादनलाई बजारसम्म लैजाने गरी अभियान थालिएको उनले बताए ।