काठमाडौं । भोलि बेलुकासम्म मन्त्रिपरिषद्लाई पूर्णता दिने गरी सत्तारुढ गठबन्धनले मन्त्रालयको भागवण्डा टुंग्याएको छ ।
प्रधानमन्त्री निवास बालुवाटारमा बुधबार अपरान्ह बसेको गठबन्धनका शीर्ष नेताहरुको बैठकले मन्त्रालयको भागवण्डा लगभग टुंग्याएको हो । बैठकमा नेताहरु कुन दलले कति मन्त्रालय पाउने भन्ने विषयमा सहमति जुटाएका छन् ।
बिहीबार बेलुकीसम्म मन्त्रिपरिषदले पूर्णता पाउने बैठकमा सहभागी जसपा नेता राजेन्द्र श्रेष्ठले बताए । ‘मन्त्रालय भागबन्डा लगभग टुंगिएको छ। भोलि बेलुकीसम्म मन्त्रिपरिषद बिस्तार हुन्छ । सबै पार्टीले आ–आफ्नो भागमा परेको मन्त्रालयमा मन्त्रीहरुको नाम दिनुहुनेछ, त्यसपछि मन्त्रीहरुको शपथ हुन्छ ।’ श्रेष्ठले भने, ‘राष्ट्रिय जनमोर्चाबाहेक ९ दल सरकारमा सहभागी हुन्छन्।’
बैठकमा कांग्रेसले ८, माओवादीले ५, एकीकृत समाजवादी र जसपा २–२ मन्त्रालय पाउने सहमति भएको छ । यसैगरी, जनमतलाई एक राज्यमन्त्रीसहित २, लोसपा १, उन्मुक्तिलाई १, आम जनता पार्टीलाई १ र नेसपालाई १ मन्त्रालय दिने सहमति भएको छ ।
प्रतिक्रिया