काठमाडौं । पार्टीभित्रको अन्तसंघर्ष नाटकीय रुपमा मंगलबारदेखि तिब्र बनेपछि नेपाल कम्युनिष्ट पार्टी नेकपाको जारी स्थायी कमिटी बैठक स्थगित भएको छ ।
बैठक बिहीबार बिहान ११ बजेसम्मका लागि स्थगित गरिएको छ । आजको बैठक सुरु भए लगत्तै लिलामणि पोखरेल, मातृका यादव र एनके प्रसाईं बोलेपछि बैठक स्थगित भएको एक नेताले बताए ।
मंगलबारको बैठकमा पार्टी अध्यक्ष एवं प्रधानमन्त्री केपी शर्मा ओली र अन्य नेताहरुबीच गम्भीर मतभेद देखिएपछि नेकपाभित्र संकट उत्पन्न हुँदै गएको छ । नियमित एजेण्डा भन्दा बाहिर प्रधानमन्त्रीको अभिव्यक्तिमाथि नेताहरुले मंगलबारको बैठकमा छलफल गरेका थिए ।
यो विषय नसुल्झिएसम्म नेकपाभित्रको अन्तसंघर्षका तत्कालका लागि साम्य हुने देखिँदैन । बैठकबाट पार नलाग्ने देखिएपछि स्थगित भएको एक नेताले बताए । उनले भने, शिर्ष नेतृत्व तहबीच चरम आशंका व्याप्त रहेको अवस्थामा आपसी छलफल जरुरी देखियो । त्यसैले भोलिसम्मका लागि बैठक स्थगित भयो ।
यसअघि, बुधबार बिहान प्रधानमन्त्री ओलीले केही मन्त्री र निकट नेताहरुसँग छलफल गरेका थिए । छलफलमा सहभागीले पार्टी अध्यक्षद्वय र शिर्ष नेतृत्वबीच आपसी विश्वास, सहमति र समझदारी नभए पार्टी विघटन हुने भन्दै चिन्ता व्यक्त गरेका थिए ।
यतिबेला पार्टीमा तलमाथि केही भयो भने त्यो कम्युनिष्ट आन्दोलन र देशका लागि गम्भीर क्षति हुने भन्दै उनीहरुले समझदारीका साथ अघि बढ्न प्रधानमन्त्रीलाई सुझाव दिएका थिए ।
प्रतिक्रिया