चितवन । नारायणगढ-मुग्लिन सडकखण्ड पुन: अवरुद्ध भएको छ । बिहीबारदेखि पटकपटक बन्द हुँदै र खुल्दै आएको सो सडकखण्ड पुन: अवरुद्ध भएको हो ।
हिजो बेलुकीदेखि दुईतर्फी खुलेको सडक राति दुई बजेदेखि पुन: अवरुद्ध भएको सडक डिभिजन कार्यालय भरतपुरले जनाएको छ । सडक डिभिजन कार्यालय भरतपुर गाडी ओहोरदोहोर भैरहेको बेला तुइनखोला नजिकै पहिलेकै ठाउँमा पुन पहिरो खसेर सडक अवरुद्ध भएको हो ।
पहिरोसँगै खसेको ढुंगाले लागेर एउटा ट्रक सडक छेउमा फसेको छ । ट्रक चालक सामान्य घाइते भएका र उनको मुग्लिनमा उपचार भैरहेको पनि मुग्लिन प्रहरीले जनाएको छ ।
प्रहरीका अनुसार पहिरोसँगै सडक छेउमा कोल्टे परेर अडिएको ट्रक हटाएपछि मात्रै गाडी सञ्चालन हुन सक्छ । पहिरो पन्छाउन डोजर तैनाथ अवस्थामा रहे पनि ट्रक हटाउने क्रेन पुग्न बाँकी रहेकाले सडक खुल्न समय लाग्ने प्रहरीको भनाइ छ । यसअघि हिजो पनि शनिवार रातिदेखि अवरुद्ध भएको सडक बेलुकीपख मात्रै खुलेको थियो ।
पहिरो पन्छाएर सडक सञ्चालनमा ल्याउँदा पनि जोखिम कायमै रहने भएकाले नारायणगढ-मुग्लिन सडकखण्डमा सावधानीपूवर्क गाडी चलाउन सडक डिभिजन कार्यालय भरतपुरले अनुरोध गर्दै आएको छ ।
प्रतिक्रिया