काठमाडौं । भारतीय न्यूज टेलिभिजन च्यानलहरूलाई नेपालका वितरकहरूले प्रसारणमा रोक लगाएकाेमा सरकारले तारिफ गरेको छ ।
नेपालका विरूद्ध निरन्तर फेक न्यूज प्रसारण गर्दै आएका भारतीय टेलिभिजनहरू विरूद्ध सरकारले कुनै कारवाही नगरे पनि तिनीहरूको प्रसारण बन्द गरिएकोमा नेपाली वितरकहरूलाई धन्यवाद दिएको हो ।
सञ्चार तथा सूचना प्रविधि मन्त्रालयले शुक्रबार विज्ञप्ति जारी गर्दै आगामी दिनमा पनि आचारसंहिता लागु गर्ने गराउने सन्दर्भमा सहयोग मिल्ने अपेक्षा गरेको छ ।
विदेशी च्यानल वितरक मल्टि सिस्टम अपरेटर (एमएसओ) हरुले बिहीबार भारतीय न्युज च्यानलहरुको प्रसारण नेपालमा बन्द गरेका थिए ।
सरकारले भारतीय न्यूज टेलिभिजनहरूमाथि कुनै कारवाही नगरेपछि वितरकहरू आफै अग्रसर भएर प्रसारण रोकेका हुन् ।
बिहीबार साँझदेखि दूरदर्शनबाहेक सबै भारतीय न्युज च्यानलको प्रसारण रोकिएको छ ।
संचार मन्त्रालयले देशको राष्ट्रियता एवं स्वाभिमानमा आँच पुर्याउने सामाग्री उत्पादन प्रकाशन तथा प्रसारण गर्न नहुने आचार संहिता रहेको स्पष्ट पारेको छ ।
नेपाल र सम्माननीय प्रधानमन्त्रीको नाम जोडेर प्रकाशित/प्रसारित कपोलकल्पित भ्रामक र दुरासययुक्त समाचारप्रति मन्त्रालयको ध्यानाकर्षण भएको भन्दै विज्ञप्तिमा यस्ता समाचारले दुईदेशबीचको मित्रवत सम्बन्धमा असर पर्नेतर्फ ध्यान पुर्याउनुपर्ने जनाइएको छ ।
भारतीय टिभी च्यानलहरुले नेपालका बारेमा फेक न्यूज प्रसारण गर्दै आएका छन् । पछिल्लो समय जि न्यूज नामको टिभीफे प्रधानमन्त्री केपी शर्मा ओली र चिनियाँ राजदूतको नाम जोडेर आपत्तिजनक रिपोर्ट प्रसारण गरेपछि सामाजिक सञ्जालमा भारतीय न्यूज टिभी रोक्नुपर्ने आवाज उठेको थियो ।
प्रतिक्रिया