एमाले प्रथम लुम्बिनी प्रदेश अधिवेशनको तयारी तिब्र, प्राविधिकको टोलीसहित कार्यक्रम स्थलको अवलोकन

बुटवल । भाद्र १६ र १७ गते बुटवलमा हुन लागेको नेकपा एमालेको प्रथम लुम्बिनी प्रदेश अधिवेशनको तयारीका लागि नेकपा एमालेकी सचिव तथा लुम्बिनी प्रदेश ईन्चार्ज पद्मा अर्यालले कार्यक्रम स्थलको अवलोकलन गरेकी छन् ।

प्रदेश अधिवेशनको तयारीलाई तिब्रता दिएको एमालेले बुटवलको अन्तराष्ट्रिय सम्मेलन केन्द्रमा प्रथम अधिवेशन गर्न लागेको हो । सोही क्रममा मञ्च व्यवस्थापन, उद्घाटन सत्र तथा बन्द सत्र सञ्चालनका लागि प्राविधिकको टोलीसहित पुगेकी नेतृ अर्यालले कार्यक्रम स्थलको अवलोकन गरेकी हुन् ।

मञ्चमा वक्तालाई उपस्थित गराउने बाहेक अतिथी आसनग्रहण नगराउने नेकपा एमालेको निर्णय लुम्बिनी प्रदेशको अधिवेशनबाट कार्यान्वयन हुने बताउँदै आएकी उनले सोही अनुसार मञ्च व्यवस्थापन गर्न सुझाव दिएकी छिन । ‘यो अधिवेशन पहिलो सार्वजनिक र ठूलो कार्यक्रम हुने छ जुन कार्यक्रमले पार्टी केन्द्रको निर्णयलाई कार्यन्वयन गर्दै ऐतिहासिक र रचनात्मक सन्देश दिने छ ।’ अर्यालले भनिन् ।

अर्यालले प्रदेश अधिवेशनमा पार्टी अध्यक्ष केपी ओलीसहित आधा दर्जन बढी पदाधिकारी सहभागी हुने भएपनि पदाधिकारी सबैको आसन मञ्चमा नभई प्रतिनिधिको रोहमै रहने बताएकी हुन् । कुल ८२ हजार ३०३ पार्टी सदस्य रहेको लुम्बिनी प्रदेशमा अधिवेशनका लागि १ हजार प्रतिनिधी छनोट हुने एमालेले जनाएको छ । जसको लागि यही भदौ ९ गते १०९ वटै पालिकाबाट एकैपटक प्रतिनिधि चयन गर्दैछ ।

अधिवेशनमा मूल नेतृत्व सकेसम्म सर्वसम्मत बनाउने कोशिश रहने अर्यालले बताइन् । ‘सकेसम्म सर्वसम्मत् नेतृत्व छानौं भन्ने हो, यदि त्यसो हुन सकेन भनेपनि लोकतान्त्रिक विधिको प्रयोग गरि स्वस्थ प्रतिष्पर्धाबाट नेतृत्व चयन गर्ने बाटो खुल्ला रहन्छ,’ उनले भनिन् । निर्वाचनमा जाँदा कार्यकर्ताहरुको मन र भावना विभाजित नहोस् भन्ने तर्फ पार्टी पंक्ति सचेत रहेको भन्दै उनले सर्वसम्मत् हुन नसके पार्टी नेतृत्वले कुनै जवर्जस्ती नगर्ने उनको भनाई छ । ‘नेतृत्वका लागि कसैले इच्छा देखाउनुहुन्छ भने उहाँको इच्छालाई पार्टी नेतृत्वले दवाउँदैन, इच्छुकले लोकतान्त्रिक विधि अनुसार स्वस्थ प्रतिष्पर्धा गर्न सक्नुहुन्छ,’ अर्यालको भनाई थियो ।

अर्यालले अधिवेशनले लुम्बिनीमा पार्टीले लिने कार्यदिशा, सांगठनिक अनुशासन र पार्टीपंक्तिलाई परिचालन गरी जनतासँग एकाकार गर्ने कुरामा नयाँ मार्गनिर्देश गर्ने पनि बताइन् । वर्षा र गर्मीयामको समयलाई मध्यनजर गर्दै ठूलो जनसहभागिता नजुटाई अधिवेशन गरिने उनले बताईन् ।