बझाङलाई केन्द्र बनाएर ६.३ म्याग्निच्युडको भूकम्प, कैयौं घर भत्किए, तीन जना घाइते

बझाङ । मंगलबार दिउँसो गएको भूकम्पमा परी बझाङमा दुई जना घाइते भएका छन् ।

भूकम्पपछि भत्एिको घरले च्यापेर जयपृथ्वी नगरपालिका–१० का दुई जना घाइते भएका हुन् । उनीहरुलाई उपचारका लागि जिल्ला अस्पताल लगिएको जिल्ला प्रहरी कार्यालय बझाङले जनाएको छ ।

यस्तै भूकम्पका कारण सुख्खा पहिरो जाँदा जयपृथ्वी राजमार्ग पनि अवरुद्ध भएको छ । जयपृथ्वी नगरपालिकाको माल्लालाग्ना भिरको केही ठाउँमा पहिरो गएको छ ।

अहिलेसम्म मानवीय क्षति नभएको तर थुप्रै संरचना भत्किएको प्रहरीले जनाएको छ । अहिले क्षतिको विवरण संकलन गर्ने काम भैरहेको छ ।

बझाङको जयपृथ्वी नगरपालिकालाई केन्द्रबिन्दू बनाएर दिउँसो २ बजेर ४० मिनेटमा ५ दशमलव ३ रेक्टरको भूकम्प गएको थियो । त्यसको २६ मिनेटपछि सोही क्षेत्रमा ६ दशमलव ३ रेक्टरको भूकम्प गएको राष्ट्रिय भूकम्पमापन केन्द्रले जनाएको छ ।

भूकम्पको धक्का सुदूरपश्चिमका सबै जिल्ला र कर्णाली, बाँके जिल्लामा समेत महसुस गरिएको थियो । यस्तै भारतको दिल्लीमा पनि भूकम्पको धक्का महशुस गरिएको भारतीय संचार माध्यमले जनाएका छन् ।