काठमाडौं । निरन्तरको वर्षापछि आएको बाढीका कारण पृथ्वी राजमार्गको एक महत्वपूर्ण पुल क्षतिग्रस्त बनेको छ ।
चितवन र धादिङ जिल्लालाई जोड्ने मोवाखोलाको पुललाई बाढीले क्षतिग्रस्त बनाएको हो । सवारी आवतजावत हुन नमिल्ने गरी पुलको धादिङतिरको बेसलाई क्षतिग्रस्त बनाएको छ ।
बाह्र मिटर पुलको एप्रोच सडकको भाग बाढीले बगाएको सडक डिभिजन कार्यालय भरतपुरका इञ्जिनीयर शिव खनालले जानकारी दिए । खनालले जति सक्दो छिटो सडक मर्मत गरी यातायात सञ्चालनको प्रयास गरिने बताए ।
जोगिमारा प्रहरी कार्यालयका हवल्दार उपेन्द्र श्रेष्ठले दिउँसो पुल भासिएर मानिससमेत हिँड्न नसक्ने भएको जानकारी दिए। श्रेष्ठले वैकल्पिक उपाय नखोजेसम्म तत्काल सडक सञ्चालनको सम्भावना नरहेको बताए ।
अहिले सवारी आवतजावत ठप्प भएको इलाका प्रहरी कार्यालय गजुरीले जनाएको छ । पृथ्वी राजमार्ग राजधानी काठमाडौं प्रवेश गर्ने र बाहिरिने महत्वपूर्ण राजमार्ग हो ।
वर्षाका कारण आएको बाढी र पहिरोले धादिङका अन्य स्थानमा समेत सडक समेत अवरुद्ध भएको छ । फुर्खेखोला नजिकै ठूलो पहिरो खसेको छ । सडकमाथिबाट ससाना पहिरो खस्नो, लेदा माटो खस्ने क्रम जारी छ ।
प्रतिक्रिया