एमाले महासचिव पोखरेल पनि उभिए टिकटकरको पक्षमा

काठमाडौं । कांग्रेस महामन्त्री द्वय टिकटकको पक्षमा उभिएलगत्तै नेकपा एमालेका महासचिव शंकर पोखरेलले पनि टिकटकरलाई साथ दिएका छन् । महासचिव पोखरेलले कुनै एउटा मात्र सामाजिक सञ्जाल प्लेटफार्मलाई प्रतिबन्ध लगाउनु उचित नभएको बताएका छन् ।

सोमबार सरकारले टिकटकमाथि प्रतिबन्ध लगाउने निर्णय गरेपछि सामाजिक सञ्जालमा उनले टिकटकमाथिको प्रतिबन्ध उचित नभएको बताएका हुन् । ‘नियमनका नाममा छनौट आधारित प्लेटफर्म नै बन्द गर्ने कुरा उचित भएन है । अराजकता र छाडापनका लागि कुनै एक प्लेटफर्मको मात्र प्रयोग भएको छ वा हुन्छ भन्ने कुरा सत्य होइन ।’ उनले लेखेका छन् ।

उनले सामाजिक सञ्जालमा प्रस्तुत गरिएको सामग्रीका आधारमा नियमन गरी अराजकता र छाडापन रोक्नु उपयुक्त हुने समेत बताएका छन् । उनले कन्टेन्ट आधारित नियमन नै अराजकता र छाडापन रोक्ने उपयुक्त बाटो भएको उल्लेख गर्दै त्यतर्फ ध्यान दिन सरकारलाई सुझाएका छन् ।