काठमाडौं । हलहरुले पर्याप्त शो नदिएको भन्दै शुक्रबारबाट प्रदर्शन रोक्ने चेतावनी दिएको चलचित्र निर्माण टिमले प्रदर्शक संस्थासँगको सहमतिमा मंगलबार सम्म प्रदर्शन नरोक्ने भएको छ ।
बिहीवार फिल्म निर्माता र प्रदर्शक संस्था चलचित्र संघबीच थप छलफल गर्ने सहमति सहित मंगलबारसम्मका लागि प्रदर्शनलाई निरन्तरता दिने निर्णय भएको हो ।
संघको कार्यालय विशालनगरमा बसेको बैठकमा दर्शकको मागअनुसार शो बढाउँदै जाने कुरामा सहमति जुटेको चलचित्र संघका महासचिव नरेन्द्र महर्जनले बताए ।
चलचित्र संघले बैठकबारे विज्ञप्ति प्रकाशित गर्दै मंगलबार थप छलफल गर्ने गरि प्रदर्शनलाई निरन्तरता दिने जनाएको छ । बैठकमा फिल्म चलिञ्जेल ५० प्रतिशत सेयर कायम गर्नुपर्ने निर्माताको मागमा सहमति जुट्न नसकेको बताइएको छ। यसका लागि मंगलबार पुनः अर्को चरणको बैठक बस्ने सहमति पनि जुटेको महासचिव महर्जनले बताए ।
चलचित्र संघका उपत्यका सभापति सुरेन्द्र थापाले बैठकको सहमतिअनुसार ‘दिमाग खराब’को प्रदर्शनलाई निरन्तरता दिने निर्णय भएको बताए । बैठकमा फिल्मका तर्फबाट निर्माता, निर्देशक र वितरक सहभागि थिए ।
प्रतिक्रिया