नेपालगञ्ज । अख्तियार दुरुपयोग अनुसन्धान आयोग बुटवल अन्तर्गतको सम्पर्क कार्यालय नेपालगञ्जले भेरी अस्पताल बाँकेका एकजना कर्मचारीलाई पक्राउ गरेको छ ।
भेरी अस्पतालमा कार्यरत कम्प्युटर अपरेटर अरुणराज खनालको साथबाट स्रोत नखुलेको १६ लाख १३ हजार ९७५ रुपैयाँसहित अस्पतालबाट पक्राउ गरेको हो ।
अख्तियार दुरुपयोग अनुसन्धान आयोग नेपालगञ्जका प्रमुख गणेश गैरेले स्रोत नखुलेको रकमसहित पक्राउ गरिएको जानकारी दिए । गैरेका अनुसार खनालको कार्यकक्षमा रहेको दराजबाट उक्त रकम बरामद भएको हो ।
विभिन्न फर्म तथा पसलेहरुबाट लिएको कमिसन तथा चेक रकम खनालले आफ्नै कार्यकक्षमा राखेको भन्ने सूचनाको आधारमा आयोगको टोलीले उनलाई नियन्त्रणमा लिएर थप अनुसन्धान गरिरहेको गैरेले बताए ।
उनीमाथि थप अनुसन्धान भइरहेको अख्तियार नेपालगञ्जले जनाएको छ ।
प्रतिक्रिया