सैनिकको कुटाईबाट चेपाङ युवाको मृत्यु प्रकरण; छानविनमा सघाउने सेनाको प्रतिवद्धता

काठमाडौं । नेपाली सेनाले चितवन राष्ट्रिय निकुञ्जमा भएको घटनाको छानविन सुरु भएको जनाएको छ ।

राष्ट्रिय निकुञ्जको सुरक्षार्थ रहेका सैनिकको कुटाईबाट स्थानीय एक चेपाङ युवकको मृत्यु भएपछि सेनाले आन्तरिक छानविन सुरु गरेको जनाएको हो ।

नेपाली सेनाको सैनिक जनसम्पर्क निर्देशनालयले आज एक विज्ञप्ति जारी गर्दै विस्तृत छानविनमा पूर्ण सहयोग गर्ने जनाएको छ ।

सेनाले भनेको छ, नेपाली सेना, नेपाल सरकारको कार्यादेश अनुसार जिम्मेवारीपूर्ण ढंगले प्रकृति संरक्षण कार्य सम्पादन गर्न प्रतिबद्ध रहेको छ ।’

चितवन राष्ट्रिय निकुञ्जको सुरक्षाका लागि बसेका सैनिकले पूर्वी चितवनको राप्ती नगरपालिका २ मिलन टोलका २४ वर्षीय राजकुमार चेपाङलाई नियन्त्रणमा लिएर कुटपिट गरेका थिए ।

साउन १ गते नियन्त्रणमा लिएका चेपाङसहित सात जनालाई सेनाले कुटपिट गरेर सोही दिन छोडेको थियो । तर घर फर्किएपछि राजकुमार भने सोही दिनदेखि नै बिरामी भएका थिए । उनको गत बुधबार उपचारकै क्रममा भरतपुर अस्पतालमा मृत्यु भएको थियो ।

सेनाले कुटेर छोराको मृत्यु भएको भन्दै बाबु विष्णुलाल चेपाङले घटनाको छानविन गरी दोषीलाई सजायँ दिन माग गरेका छन् ।

राप्ती नदी तरेर राष्ट्रिय निकुञ्जभित्र छिरेका चेपाङ युवाहरुलाई सेनाले नियन्त्रणमा लिएको थियो ।