काठमाडौं । खातामा रकम बिना चेक दिएर बैकिङ कसूर मुद्दाका फरार काठमाडौं कलंकीका राजेन्द्रकुमार महर्जनलाई प्रहरीले पक्राउ गरेको छ ।
ललितपुर महालक्ष्मी नगरपालिका-४ इमाडोल बस्ने काठमाडौं महानगरपालिका-१४ कलंकी घर भएका महर्जनलाई आइतबार प्रहरीले पक्राउ गरेको हो ।
उच्च अदालत पाटनको २०७६ माघ २० गतेको फैसलाले १० दिन कैद र १५ लाख ७५ हजार रुपैयाँ जरिवानाको फैसलासँगै महर्जन फरार भएका थिए ।
उनलाई केन्द्रीय अनुसन्धान व्यूरो महाराजगंजबाट खटिएको प्रहरीले काठमाडौं कलंकीबाट पक्राउ गरेको हो ।
प्रहरीका अनुसार महर्जनले नेपाल इन्भेष्टमेन्ट बैंकमा रहेको खाता नम्बर ०५२०५०५००६३९३० को खातामा पर्याप्त मौज्दात रकम नभएकै अवस्थामा २०७५ भदौ ५ गते चेक काटेर दिएकोमा उजुरीकर्ताले पटक पटक बैंकबाट भुक्तानी लिन जाँदा पनि रकम नभएको बताईएपछि बैंकिङ् कसुरमा उजुरी दिएका थिए ।
अदालतले बैकिङ् कसूरजन्य अपराध गरेको ठहर गरी कैद र जरिवाना हुने फैसला गरेको थियो ।
महर्जनलाई फैसला कार्यान्वयनका लागि जिल्ला अदालत ललितपुर पठाइएको प्रहरीले जनाएको छ ।
प्रतिक्रिया