बाँसबारी छालाजुत्ता कारखानाको १० रोपनी जग्गा सरकारीकरण

काठमाडौं । सरकारले बाँसबारी छालाजुत्ता कारखानाको १० रोपनी जग्गा सरकारकै नाममा ल्याएको छ ।

काठमाडौं महानगरपालिका–३ स्थित बाँसबारी छालाजुत्ता कारखानाको १० रोपनी जग्गा नेपाल सरकारको नाममा ल्याइएको हो ।

मालपोत ऐन २०२४ अनुसार बाँसबारी छाला जुत्ता कारखानाको जग्गा सरकारले आफ्नो स्वामित्वमा ल्याएको शुक्रबार भूमी व्यवस्था, सहकारी तथा गरिबी निवारण मन्त्रालयमा आयोजित पत्रकार सम्मेलनमा जानकारी दिइएको छ ।

२०४४ सालमा च्याम्पियन फुटवेयरको नाममा १० रोपनी सरकारी जग्गा हडपेको भन्दै नेपाल प्रहरीको केन्द्रीय अनुसन्धान ब्युरो (सिआइबी)ले व्यवसायी अरूण चौधरी, कारखानाका कार्यकारी अध्यक्ष अजितनारायण सिंह थापा र सञ्जय ठाकुरलाई माघ १८ गते पक्राउ गरेको थियो। सीआईबीले सोही प्रकरणमा सांसद विनोद चौधरीसँग पनि बयान लिएको थियो । सो जग्गा अहिले चौधरी ग्रुपको चाँदबाग रेसिडेन्सी प्रालिको नाममा रहेको थियो ।