कोरोना महामारीको संक्रमण दरमा भारतको छलाङ; अमेरिका र ब्राजिललाई पछि पार्दै भारत पहिलो स्थानमा

कोरोना भाइरसको विश्वव्यापी महामारी कायमै छ । छिमेकी भारतमा कोरोनाको संक्रमण दर अत्याधिक बढिरहेको छ ।

पछिल्लो २० दिनमा भारतमा कोरोना संक्रमणको दर दुई गुणाले बढेको छ । यो दर अमेरिका र ब्राजिलको तुलनामा धेरै हो । संक्रमणको मामिलामा भने यिनै दुई देश मात्र भारत भन्दा अघि छन् ।

अहिलेसम्मको संक्रमणको हिसाबले भारत तेस्रो स्थानमा कायम छ । भारतमा कोरोना भाइरसको संक्रमणको तथ्यांकले २० लाख पार गरेको छ ।

आधिकारिक तथ्यांक अनुसार गत २४ घण्टामा भारतमा ५८ हजार नयाँ संक्रमित थपिएका छन् । देशभर कुल संक्रमितको संख्या २० लाख २१ हजार ४०० भन्दा माथि पुगेको छ ।

अहिले पनि अमेरिका पहिलो स्थानमै रहेको छ भने ब्राजिल दोस्रो स्थानमा रहेको छ ।

भारतमा अहिलेसम्म कोरोना संक्रमणका कारण ४० हजार बढीको ज्यान गैसकेको छ ।

यसैगरी मर्ने मानिसको तथ्यांकको आधारमा भारत पाचौं स्थानमा रहेको छ ।

विश्वभर हालसम्म १ करोड ९२ लाख ५५ हजार भन्दा बढी मानिसलाई कोरोना भाइरसको संक्रमण भएको छ । जसमध्ये, ७ लाख १७ हजार भन्दा बढीको ज्यान गैसकेको छ ।

१ करोड २३ लाख ५७ हजार मानिस कोरोनाको संक्रमणबाट मुक्त भएका छन् । सक्रिय संक्रमितको संख्या ६१ लाख माथि रहेको छ ।