वीरगन्ज । देशकै प्रमुख आर्थिक नगर वीरगन्ज कोरोना भाइरसको संक्रमणबाट नराम्रो गरी प्रभावित भएको छ ।
नेपालमा कोरोना भाइरसबाट हुने मृत्युको इपिसेन्टर बनेको वीरगन्ज र पर्सामा मृत्युदर निरन्तर बढिरहेको छ ।
पर्सामा शुक्रबार थप दुई जनाको कोरोना संक्रमणकै कारण मृत्यु भएको छ ।
वीरगन्ज महानगरपालिका ११ श्रीपुरका ७९ वर्ष र ५७ वर्षका दुई पुरुषको मृत्यु भएको नारायणी अस्पताल स्रोतले जनाएको छ ।
७९ वर्षीय वृद्धको घरमै मृत्यु भएको र ५७ वर्षीय अर्का पुरुषको गण्डक कोभिड अस्पतालमा मृत्यु भएको हो । मृत्युको औपचारिक पुष्टि भने अस्पतालले गरिसकेको छैन ।
पर्सामा मृत्यु दर जति बढी छ त्यो भन्दा बढी कोरोना भाइरसको संक्रमण दर रहेको छ ।
शुक्रबार बिहान सम्मको तथ्यांकमा थप १ सय ४२ जनामा कोरोना संक्रमण पुष्टि भएको छ । ७९ वर्ष र ५७ वर्षका दुई मृतक सहित १४२ जनामा संक्रमण पुष्टि भएको हो ।
जसमध्ये ४३ जना जिल्ला प्रहरी कार्यालयका थुनुवा मात्रै रहेका छन् । संक्रमित मध्ये २२ जना महिला रहेका छन् ।
संक्रमितमध्ये ३ जना बारा र ४ जना रौतहटका रहेका छन्, बाँकी संक्रमित सबै पर्साका हुन्। ८ वर्षका बालकदेखि ७९ वर्षका वृद्धसम्मलाई संक्रमण लागेको छ ।
यउटै जिल्लामा २४घण्टाभित्र यति धेरै संक्रमण बढेको यो नै पहिलो घटना हो । यसैगरी वीरगन्ज महानगरपालिकाका मेयर विजय सरावगीको परिवारका थप ३ जना सदस्यलाई पनि संक्रमण पुष्टि भएको छ ।
प्रतिक्रिया