काठमाडौं । सत्तारुढ नेपाल कम्युनिष्ट पार्टी नेकपाभित्रको गुट विवादको उत्कर्ष प्रधानमन्त्रीका मुख्य राजनीतिक सल्लाहकार र पार्टीका प्रवक्ताबीचको दोहोरीमा पुगेको छ ।
पार्टी अध्यक्ष एवं प्रधानमन्त्रीका मुख्य राजनीतिक सल्लाहकार विष्णु रिमालले प्रवक्ता नारायणकाजी श्रेष्ठमाथि कटु आक्रोश पोखेका छन् ।
नेकपाको स्थायी कमिटी सदस्य समेत रहेका रिमालले सामाजिक सञ्जाल ट्वीटरमार्फत कडा आक्रोश पोख्दै पार्टीमा बढेको विवादको आगोमा थप उत्तोलक नबन्न श्रेष्ठलाई आग्रह गरेको छन् ।
उनले मुलुक संवेदनशील मोडमा रहेको बताउँदै पार्टी एकताविरूद्ध कुनै पनि गतिविधि कतैबाट हुन नहुने जिकिर गरेका छन् । रिमालले श्रेष्ठलाई लाज जोगाउन पनि चुनौती दिएका छन् ।
इनफ इज इनफ लेख्दै रिमालले श्रेष्ठलाई मेन्सन गरेका छन्, …कम से कम पार्टी प्रवक्ता पदको लाज त जोगाउनुस। ‘बिधी र पद्दती’को नक्कली गीत गाउँदै नेताहरूलाई गुटवन्दीको आगोमा पोल्न उत्तोलक नबन्नुहोस् ! पार्टी एकता बिरूद्धका कुनैपनि गतिबिधि कतैबाट पनि नहोस् !! मुलुक संवेदनशील मोडमा छ महसूस होस्!!!
पछिल्लो समय प्रवक्ता श्रेष्ठ पार्टीको प्रवक्ता भन्दा पनि एउटा गुटको प्रवक्ता भएको ओली पक्षीय नेताहरुले आरोप लगाउँदै आएका छन् ।
पार्टीभित्र दुई अध्यक्ष एवं शिर्ष नेतृत्वबीच शक्ति संघर्ष चर्किरहेका बेला श्रेष्ठ प्रचण्ड–नेपाल पक्षमा खुलेर लागेका छन् ।
नेकपाभित्रको विवाद उत्कर्षमा पुग्दै गर्दा अब गुटपक्षीय नेताहरुबीच एकअर्कालाई सार्वजनिक रुपमा खुइल्याउने प्रवत्ति मौलाउँदै गएको छ ।
प्रतिक्रिया