बुटवल उपमहानगरपालिका र वडा नम्बर २ को संयुक्त लगानीमा जिम हाउस सञ्चालन

बुटवल । बुटवल उपमहानगरपालिका वडा नम्बर २ तल्लो फुलबारीमा जिम हाउस शुभारम्भ भएको छ । बुटवल उपमहानगरपालिका र वडा नम्बर २ को संयुक्त लगानीमा जिम हाउस सञ्चालनमा आएको हो ।

जिम हाउसको मंगलबार एक कार्यक्रमका बिच बुटवल उपमहानगरपालिकाका नगर प्रमुख खेलराज पाण्डेयले उद्घाटन गरेका हुन । कार्यक्रममा बोल्दै नगर प्रमुख पाण्डेयले बुटवलको विकास संभावना बोकेको वडा नम्बर २ भएको बताउँदै उनले वडा २ ले नै बुटवलको समृद्धिमा महत्पूर्ण भुमिका खेल्ने बताएका थिए । वडामा हुने हरेक कामलाई जनताको पहुँच पुग्ने खालको हुनुपर्ने भन्दै उनले जनताले प्रत्यक्ष लाभ पाउने गरी विकासलाई प्राथमिकता दिनुपर्ने बताएका थिए ।

उनले भने- ‘बुटवलले रोजगारी वृद्धिका लागि युवा लक्षित तालिम चलाउँदै आएका छौ ।’ वडा २ का अध्यक्ष शुनिल शाक्यले जिम हाउस निर्माणपछि वडावासीलाई स्वास्थ अभियानमा जोड्न पाउँदा खुसी लागेको बताए ।

उनले आफु अघिल्लो कार्यकालमा वडा सदस्य हुँदा खेरी नै जिम हाउसको अभियान सुरुवात गरिएको बताउँदै आफु वडा अध्यक्ष भएपछि जिम हाउस उद्घाटन गर्न पाउँदा खुसी लागेको बताए । उनले युवाहरुलाई जिम हाउस मार्फत स्वाथ्य अभियानमा जोड्न पाउँदा धेरै खुसी भएको बताए ।

२ का वडा सचिव उषा ढुंगानाले नगरपालिकाको २० लाख आर्थिक सहयोगमा जिम हाउस निर्माण गरिएको जानकारी दिईन । कार्यक्रममा वडा २ का निर्वतमान अध्यक्ष रमेश नेपाल, वडा सदस्य गौतमलाल शाक्य लगायतले आ आफ्नो भनाई राखेका थिए ।