नेपालगन्ज । बाँकेमा सुरक्षाकर्मी, कैदीबन्दी र कारगार आसपासमा पनि कोरोना संक्रमण दिन प्रतिदिन बढ्न थालेपछि कोरोना पुष्टि नभएका महिला कैदीबन्दी र थुनुवालाई दैलेख र बर्दिया जिल्ला कारागारमा सारिएको छ ।
बाँके कारागारमा क्षमता भन्दा अधिक कैदीबन्दी र थुनुवाको चाप रहेको तथा कारागार भित्रै संक्रमण भेटिएपछि कारागारमा रहेका महिला कैदीबन्दी र थुनुवाहरुलाई अन्यत्र जिल्लामा सारिएको हो । बाँकेमा रहेको कारागारको केहि भागलाई आइसोलेसन बनाएर संक्रमितको उपचार गर्ने कारागार प्रशासनले व्यवस्थापन गरेको छ ।
स्थानीय प्रशासनसंगको समन्वयमा कारागार प्रशासनले महिला कैदीबन्दीलाई दैलेख र थुनुवालाई बर्दिया जिल्ला कारागारमा सारिएको छ ।
बाँके कारागारका जेलर देबेन्द्रमान श्रेष्ठका अनुसार बाँके कारागारमा रहेका महिला कैदीबन्दी र उनका आश्रीत नाबालक गरी ३१ जना दैलेख कारागार पाठाईएको छ भने १५ जना थुनुवा र एक नावालक आश्रीत गरी १६ जनालाई बर्दिया जिल्ला कारागारमा पठाईएको छ ।
२ सय ५० पुरुष र ५० जना महिला गरी ३ सयको कैदीबन्दीको क्षमता रहेको बाँके कारगारमा हाल दोब्बर बढी ७ सय ७० पुरुष र ४५ महिला र दुई आश्रित नावालक गरी ८ सय १७ जना कैदीबन्दी र थुनुवा थिए ।
महिला कैदीबन्दीलाई अनेत्र सारेर महिला कारागारलाई कैदीबन्दीहरुको आईशोलेशन बनाउने तयारी भएको जेलर श्रेष्ठले बताए । महिला कैदीबन्दीहरुलाई विषेश सुरक्षाको प्रबन्ध मिलाई दैलेख र बर्दिया पठाईएको छ ।
कारागारमा रहेका कैदीबन्दीमा कोरोना संक्रमण पुष्टि भएपछि उनीहरुको कन्ट्याक्ट ट्रेसिङ्बाट अझै संक्रमित थपिन सक्ने सम्भावनालाई आँकलन गर्दै कैदीबन्दी र थुनुवालाई अन्यत्र पठाईएको श्रेष्ठले बताए ।
प्रतिक्रिया