पुस्पलाल चोकको दिप्सन होटलमा युवक मृत फेला

नेपालगन्ज । नेपालगन्जको पुस्पलाल चोकमा रहेको एक होटलमा एकजना युवा मृत अवस्थामा फेला परेका छन् । नाम ठेगाना नखुलेको युवाको शव दिप्सन होटलको कोठामा अर्ध नग्न अवस्थामा फेला परेको हो ।

बाँके नेपालगन्ज-२ पुष्पलाचोक नजिक दिप्सन होटेलको कोठामा वर्ण गहुँगोरो, कालो कपालमा खैरो रङ लगाएको, बायाँ हातको हत्केलाको पछाडी JIMIN र ARBIN लेखेको ट्याटु रहेको युवा मृत अवस्थामा फेला परेको प्रहरीले जनाएको छ । नामथर, वतन नखुलेको ५ फिट ८ इन्च उचाई, शरीरमा निलोमा पहेलो बुट्टा भएको पेन्टी मात्र लगाएको युवकको शव फेला परेको बाँके प्रहरी प्रवक्ता नारायण डाँगीले बताए ।

प्रहरीका अनुसार ३ जनाको समुहमा आएकाहरुले होटलमा मोबाइल नम्बर मात्र टिपाएर बुधबार राती ९ बजे होटलमा कोठा बुक गराएका थिए । बिहान अबेर सम्म कोठाबाट कुनै आवाज नआएपछि होटल संचालकले कोठामा हेर्दा २ जना होटलबाट गइसकेको र एक जना अचेत अवस्थामा देखेपछि प्रहरीलाई खबर गरेको डीएसपी डाँगीले बताए । प्रहरीले अचेत रहेका युवालाई अस्पताल पु¥याएकोमा चिकित्सकले मृत घोषणा गरिदिएको प्रहरीले जनाएको छ ।

रिसेप्सनमा टिपाएको मोबाइल नम्बरका आधारमा प्रहरीले अनुसनधान सुरु गरेको डाँगीले बताए । मृत अवस्थामा फेला परेको मृतक व्यक्तिको हाल सम्म पहिचान हुन नसकेकोले पहिचान चिन्न सक्नेले जिल्ला प्रहरी कार्यालय बाँकेमा सम्पर्क गर्न आग्रह गर्दै प्रहरीले मृतकको फोटो सार्वजनिक गरेको छ ।