बाँकेमा भएको बस दुर्घटनामा मृत्यु भएका २ जनाको सनाखत

नेपालगन्ज । बाँकेको गनापुरमा बस पल्टिदा मृत्यु भएका दुई जनाको सनाखत भएको छ । मृत्यु हुनेहरुमा तुलसीपुर उपमहानगरपालिका ६ का बसका सहचालक २४ वर्षिय सन्तोष भुसाल र सोही स्थानका ६० वर्षिय मानबहादुर वली रहेका छन् ।

दाङबाट नेपालगन्ज आउँदै गरेको भे १ ख २१२८ नम्बरको बस गनापुरमा दुर्घटनामा परेको हो । पट्टा भांच्चिएर अनियन्त्रित भई बस दुर्घटनामा परेको प्रहरीले जनाएको छ ।

बाँके प्रहरी प्रवक्ता डीएसपी नारायण डांगीले २१ जना घाइतेको नेपालगन्जको भेरी अस्पतालमा, दुई जनाको नर्सिङहोम र पांच जनाको कोहलपुर मेडिकल कलेजमा उपचार भइरहेको बताए । नर्सिङहोममा उपचार गराउन पुगेका एकजना भने डिस्चार्ज भएको उनले बताए ।