रवि लामिछानेलाई पक्राउ गर्न रुपन्देही जिल्ला अदालतबाट पनि पक्राउ अनुमति

काठमाडौँ । राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछानेलाई रुपन्देही जिल्ला अदालतले पनि प्रहरीलाई पक्राउ अनुमति दिएको छ । अदालतबाट अनुमति लिएर लामिछाने विरुद्ध रुपन्देहीमा पनि पक्राउ पुर्जी जारी भएको छ । जिल्ला अदालत रुपन्देहीले बिहीबार लामिछानेविरुद्ध प्रहरीलाई पक्राउ गर्ने अनुमति दिएको हो ।

सुप्रिम सहकारी ठगी प्रकरणमा अनुसन्धान गर्नका लागि लामिछानेसहित १२ जनाविरुद्ध यसअघि नै इलाका प्रहरी कार्यालय बुटवलबाट मुद्दा दर्ता भएकोमा आज पक्राउ पुर्जी जारी भएको जिल्ला अदालत रुपन्देहीले जनाएको छ ।

कानूनतः मुद्दा परिसकेपछि पक्राउ अनुमति लिनुपर्ने भए बमोजिम अदालतबाट अनुमति लिइएको इलाका प्रहरी कार्यालय बुटवलका प्रमुख डीएसपी विजयराज पण्डीतले बताए । उनले अनुमतिसँगै कास्की प्रहरीसँग समन्वय गरिएको जनाउँदै लामिछानेलाई रुपन्देही ल्याउन सकिने जनाए । ‘प्रमुखरुपमा कास्कीले मुद्दा हेरिरहेको छ, बयानको आवश्यकता देखिए रुपन्देही पठाउन पनि सक्छ ।’ उनले भने ।

लामिछाने पोखराको सूर्यदर्शन सहकारी ठगी प्रकरणमा अनुसन्धानका लागि जिल्ला प्रहरी कार्यालय पोखराको हिरासतमा छन् । प्रहरीले बिहीबार थप ७ दिन हिरासतमा राख्न जिल्ला अदालतबाट अनुमति पनि लिएको छ । थप भएको ७ दिनकै अवधिमा लामिछानेलाई सुप्रिम सहकारी प्रकरणमा बयानका लागि रुपन्देही ल्याउने तयारी रहेको प्रहरी स्रोतले जनाएको छ ।