नगरपालिकाले रोपेका बिरुवा काट्ने भुसाल पक्राउ, अभद्र व्यवहारमा मुद्दा

कोहलपुर । कोहलपुर नगरपालिकाले रोपेका बिरुवा रातिको समयमा काट्ने एकजना स्थानीयलाई कोहलपुर प्रहरीले पक्राउ गरेको छ । कोहलपुर नगरपालिका–१० रामनगरमा नगरपालिकाले रोपेका बिरुवा रातिको समयमा काट्ने स्थानीय लक्ष्मी प्रसाद भुसाललाई प्रहरीले पक्राउ गरेको हो ।

सडकको बिचभागमा हुर्केका ५ वटा स्वामीको रुख काटेको अभियोगमा भुसाललाई इलाका प्रहरी कार्यालय कोहलपुरले पक्राउ गरेर अनुसन्धान सुरु गरेको प्रहरीले जनाएको छ । भुसालले गत भदौ २४ गते राती आराले धमाधम काटेर ५ वटा स्वामीका बिरुवा ढलाइदिएका थिए ।

भुसालले बिरुवा काट्दै गरेको सिसिटिभी फुटेजका आधारमा उनलाई पक्राउ गरिएको हो । कोहलपुर नगर प्रहरीको जाहेरी र वन कार्यालयको अनुमतिमा भुसाललाई पक्राउ गरिएको इलाका प्रहरी कार्यालय कोहलपुरका प्रमुख धर्मराज भण्डारीले बताए । भुसाल विरुद्ध अभद्र व्यवहारको मुद्दामा अनुसन्धान जारी रहेको उनले बताए ।

प्रहरीका अनुसार भुसालले बीच सडकमा रहेका बिरुवामा बाँधेको गाईको दाम्लो नगर प्रहरीले काटेर गाई छाडिदिएको झोँकमा भुसालले बीच सडकमा हुर्किसकेका ५ वटा बिरुवा आराले काटिदिएका थिए ।