काठमाडौं । प्रधानमन्त्री केपी शर्मा ओलीले चीनसँग कुनै ऋण सम्बन्धी सम्झौता नभएको बताएका छन् । उनले बेल्ट एन्ड रोड इनिसियटिभ (बीआरआई) को समझदारीका बेलामा ऋणबारे कुनै कुरा नचलेको स्पष्ट पारे ।
चीन भ्रमणबाट आज स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै चीनसँग कुनै ऋण लिने सम्झौता नगरेको बताए ।
बिआरआईको फ्रेमवर्कमा ऋण उल्लेख नभउको उनले बताए । ‘ऋण सम्बन्धी कुरा पनि चलेको छैन । फेरि ऋणको कुरा कहाँबाट आउँछ ? उनले प्रश्न गरे, सधैं ऋण–ऋण–ऋण यो रट किन साह्रै बजिरहेको छ ? होइन भनेर हामीले पटकपटक भनेका छौं ।’
उनले बीआरआई अन्तर्गतका परियोजनाबारे छुट्टै छलफल र सहमति गर्ने बताए । यसपटक बीआरआई अन्तर्गत विभिन्न परियोजनाहरूको कुरा गरेको उल्लेख गर्दै प्रधानमन्त्री ओलीले हरेक परियोजना अन्तर्गत पछि सरकारले छुट्टै छलफल र सहमतिहरू गर्ने जनाए ।
आफ्नो चीन भ्रमणका क्रममा राष्ट्रपति सी चिनफिङ, प्रधानमन्त्री लीगायतसँगको छुट्टाछुट्टै भेटवार्ता भएको भन्दै ती भेटवार्तामा दुई पक्षीय हितका बारेमा कुराकानी भएको बताए ।
प्रतिक्रिया