काठमाडौं । खोटाङको दिक्तेल रूपाकोट मझुवागढी नगरपालिकाका प्रमुख तीर्थराज भट्टराईले बाँस र स्थानीय उत्पादनको प्रवर्द्धनको माग गर्दै सत्याग्रह सुरु गरेका छन् ।
आइतबारदेखि काठमाडौंको माइतीघर मण्डलामा मेयस भट्टराईले सत्याग्रह सुरु गरेका हुन् । उनी बाँस तथा बाँसबाट निर्मित सामग्रीसहित सत्याग्रहमा बसेका छन् ।
भट्टराईले स्थानीय स्रोत र सीपमा आधारित बाँसका उत्पादनलाई प्राथमिकता दिनु पर्नेमा सरकार उदासीन बनेको गुनासो गरेका छन्।
उनका अनुसार यसअघि जेठ २३ र असार ६ गते प्रधानमन्त्रीलाई सात बुँदे मागसहितको ज्ञापन पत्र बुझाइएको थियो, तर अहिलेसम्म कुनै कार्यान्वयन नदेखिएकोले आफू सत्याग्रह गर्न बाध्य भएको हो।
उनी सत्याग्रहमा बस्नुअघि बाँस र त्यसबाट बनाइएका मान्द्रो, गुन्द्री, राडी, पराललगायतका सामग्रीसहित सिंहदरबार परिक्रमा गर्न खोजेका थिए । तर सुरक्षाकर्मीले रोक लगाइदिए ।
मागहरू सम्बोधन नभए आगामी तीन दिनसम्म निरन्तर सत्याग्रह गर्ने र त्यसपछि पनि सुनुवाइ नभए आमरण अनशनमा बस्ने चेतावनी उनले दिएका छन्।
उनी साउन ४ गते नै बाँस तथा परम्परागत सामग्रीसहित काठमाडौं पुगेका थिए।
खोटाङमा यसअघि फागुन महिनामा पहिलोपटक राष्ट्रिय बाँस सम्मेलन आयोजना गरिएको थियो, जसको उद्देश्य बाँसजन्य उद्योग र हस्तकलाको प्रवर्द्धन गर्नु रहेको थियो।
प्रतिक्रिया