हेटौंडा । बागमती प्रदेशका मुख्यमन्त्री बहादुर सिंह लामालेनेपाली कांग्रेस बागमती प्रदेश संसदीय दलका नेताको पद गुमाएका छन् ।
कांग्रेस बागमती संसदीय दलमा मंगलबार भएको मत विभाजनपछि उनी विरुद्धको अविश्वासको प्रस्ताव पारित भएको हो । अविश्वास प्रस्ताव पारित भएसँगै लामा संसदीय दलको नेताबाट हटाइएका छन् ।
मुख्यमन्त्री लामाको पक्षमा १५ जना सांसद मात्र उभिए भने उनको विपक्षमा २२ जना सांसद खडा भए । ती २२ सांसदले लामाका मुख्य प्रतिस्पर्धी ईन्द्रबहादुर बानियाँको पक्षमा खुलेका छन् । कांग्रेसका बागमती प्रदेशमा कुल ३७ जना सांसद रहेका छन्। लामा र बानियाँ दुवै कांग्रेसभित्र सभापति शेरबहादुर देउवा गुटलाई समर्थन गर्छन् ।
अब भोलि नयाँ संसदीय दल नेताको निर्वाचन हुने भएको छ । आजको मतपरिणाम हेर्दा इन्द्र बानिँया स्वतः संसदीय दलको नेता बन्ने निश्चित भएको छ । यद्यपी, संसदीय दल नेताको हैसियत गुमाइसकेका लामा पुनः प्रतिस्पर्धामा आउने वा नआउने विषय अझै स्पष्ट भएको छैन।
संसदीय दलको नेता बनेपछि आफु मुख्यमन्त्री बन्ने बानियाँको तयारी छ । यद्यपी, लामाले मुख्यमन्त्रीबाट राजीनामा नदिएसम्म बानियाँ मुख्यमन्त्री बन्न भने पाउनेछैनन् । लामाले या त स्वेच्छाले राजीनामा दिनुपर्छ या त प्रदेशसभा बैठकबाट अविश्वासको प्रस्ताव पारित हुनुपर्छ ।
प्रतिक्रिया