पेरिसडाँडामा ‘२३ औं बोत्ले स्मृति दिवस’ : आफू जिवित रहनु परेको कारण अर्को क्रान्ति गर्न – प्रचण्ड

काठमाडौं । दोलखाको साविक बोत्ले गाविसमा २०५७ सालमा तत्कालीन सुरक्षाकर्मीहरुद्वारा हत्या गरिएका १५ जना माओवादी योद्धाहरूको स्मृतिमा आयोजित ‘ २३ औं बोत्ले स्मृति दिवस’ नेकपा (माओवादी केन्द्र) को केन्द्रीय कार्यालय, पेरिसडाँडामा सम्पन्न भएको छ।

कोत्सेमा भएको तत्कालिन घटनासम्बन्धी वृत्तचित्रको प्रदर्शनबाट स्मृति दिवस प्रारम्भ भएको थियो । बृत्तचित्रमा १५ जना योद्धाहरूलाई ‘समर्पित’ गरिएको जनयुद्धको इतिहास झल्काउने दृष्यहरू प्रस्तुत गरिएका थिए।

कार्यक्रममा बोल्दै माओवादी केन्द्रका अध्यक्ष पुष्पकमल दाहाल ‘प्रचण्ड’ ले सहिदहरूको बलिदानलाई नमन गरे । उनले बोत्ले घटना माओवादी आन्दोलनको एउटा पीडादायी तर ऐतिहासिक मोड भएको उल्लेख गरे । त्याग र बलिदानका आधारमा निर्माण भएको हाम्रो यात्रा अझ न्याय, समानता र समृद्धिको दिशामा अगाडि बढिरहेछ।” उनले भने ।

शहीदहरुलाई सम्झिँदै अध्यक्ष प्रचण्डले प्रतिक्रियावादीहरुले षडयन्त्र गरिरहेको बताउँदै एकताबद्ध भएर प्रतिरोध गर्ने बताए । आफू जिवित रहनु परेको कारण अर्को क्रान्ति गर्नको लागि भएको उनको भनाई छ ।

उनले अहिले शान्ति प्रक्रियाका बाँकी काम टुंग्याउने विषय अघि बढेको बताउँदै यसमा पनि चलखेलहरु भइरहेको दाबी गरे । उनले शान्ति प्रक्रियाका बाँकी काम टुंग्याउने विषय अघि बढेको जनाउँदै यसमा पनि चलखेल भइराखेको बताए । ‘तिखो आँखाले हेरिरहनपर्छ, हामीले एकताबद्ध गरेनौं भने अप्ठेरो आउन सक्छ । म अपिल गर्छु ।’ उनले भने ।

पूर्वप्रधानमन्त्रीसमेत रहेका प्रचण्डले जनयुद्धलाई राष्ट्रिय दिवस नमान्नु पर्ने कुनै कारण नभएको पनि बताए । यो अदालत प्रवेश गर्ने विषय नै नभएको बताउँदै उनले यसलाई राष्ट्रिय दिवसकै रुपमा आत्मसाथ गरेर मनाउनु पर्ने बताए ।

कार्यक्रममा बोत्ले घटनाका सहिदहरूको परिवारलाई सम्मान गरिएको थियो। कार्यक्रममा सहिद परिवारका सदस्यहरुले राज्यबाट अझै न्याय नपाएको भन्दै कार्यक्रममा आफुहरुले भोग्दै आएको पीडा सुनाएका थिए । परिवारजनहरूले सहिदहरूको सपना पूरा गर्न पार्टी नेतृत्वले गम्भीरता अपनाउनुपर्ने मागसमेत गरे ।