नेपालगन्ज । एकवर्ष भित्र दिवंगत भएका परिवारको सदस्यहरुको सम्झनामा नेपालगन्जमा गाईजात्रा प्रदर्शन गरिएको छ । नेवास् पुचस् बाँकेको आयोजनामा नेपालगन्ज र यस आसपासका नेवार समुदायमा यस वर्षमा दिवंगत भएका परिवारका सदस्यहरुको सम्झनामा गाइजात्रा निकालिएको हो ।
‘भाषा, संस्कृति तथा परम्पराको जगेर्ना गरौं’ भन्ने मूल नाराका साथ एकवर्षको समयमा दिवंगत भएका सदस्यका सात परिवारले आफ्ना दिवंगत आफन्तहरूको सम्झनामा एकैस्थानमा भेला भई गाईजात्रा निकालेका हुन् ।
सुर्खेत रोडस्थित स्वस्तिक कटेजबाट निकालिएको गाईजात्रा धम्बोझी चोक, सहिद सेतु विक चोक, न्युरोड हुँदै बागेश्वरी मन्दिर पार्कसम्म पुगेर सम्पन्न भएको थियो । उक्त अवसरमा नेवारी पोशाकमा सजिएका महिला तथा पुरुषहरूले नेवारी भाषाका गीतमा नृत्य प्रस्तुत गर्नुका साथै लाखे नाच पनि देखाएका थिए ।
नेवारी समुदायमा एक वर्षभित्र मृत्यु भएका आफन्तहरूको सम्झनामा गाई वा मानिसलाई गाईको स्वरूपमा सजाएर परिक्रमा गराउने परम्परा छ । गाईको स्वरुप धारण गरि परिक्रमा गराउँदा मृतकले गाईको पुच्छर समाई बैतरणी नदी पार गर्ने र मोक्ष प्राप्त गर्ने जनबिश्वास रहँदै आएको छ ।
नेपालगन्जमा यसवर्ष दिवंगत भएका कमलादेवी श्रेष्ठ, राधादेवी श्रेष्ठ, सुशीला चुके, दमयन्ती श्रेष्ठ, माधवलाल श्रेष्ठ, केदारप्रसाद श्रेष्ठ र दिपाकुमारी रेग्मी श्रेष्ठको सम्झनामा गाईजात्रा निकालिएको हो ।
प्रतिक्रिया