काठमाडौं । अफगानिस्तानको दक्षिण-पूर्वी क्षेत्रमा आइतबार राति ६.० म्याग्निच्युडको शक्तिशाली भूकम्प गएको छ । पाकिस्तानको सीमा नजिकै गएको भूकम्पका कारण कम्तीमा २० जनाको मृत्यु भएको र १०० जना घाइते भएको अन्तर्राष्ट्रिय सञ्चारमाध्यम बीबीसीले जनाएको छ ।
भूकम्पका कारण दर्जनौँ घरहरू पूर्णरूपमा भत्किएका छन् । मृतकको संख्या अझ बढ्न सक्ने अनुमान गरिएको छ । तालिबान सरकारले उद्धार कार्यमा संलग्न मानवीय संस्थाहरूलाई दुर्गम तथा पहाडी क्षेत्रमा सहयोग गर्न आग्रह गरेको छ । पहिरो र बाढीका कारण केही क्षेत्रमा हवाई मार्ग बाहेक पुग्न कठिन भएको अधिकारीहरूले बताएका छन् ।
अमेरिकी जियोलोजिकल सर्वेका अनुसार भूकम्पको केन्द्रबिन्दु नन्गरहार प्रान्तको जलालाबादनजिकै, ८ किलोमिटर गहिराइमा रहेको थियो । स्थानीय समयअनुसार राति ११:४७ बजे गएको भूकम्पले अफगानिस्तानसँगै पाकिस्तानको राजधानी इस्लामाबादसम्म भवनहरू हल्लाएको बताइएको छ ।
यो पछिल्लो एक महिनामा अफगानिस्तानमा गएको पाँचौँ भूकम्प हो । यसअघि अगस्ट ८ देखि २७ सम्मका विभिन्न मितिहरूमा ४.२ देखि ५.४ म्याग्निच्युडसम्मका चारवटा भूकम्प गइसकेका थिए ।
भूकम्पको दृष्टिले संवेदनशील मानिने अफगानिस्तानमा पछिल्ला भूकम्पहरूले ठूलो जनधनको क्षति गराइरहेको भन्दै स्थानीय अधिकारीहरूले आपतकालीन राहत र उद्धार कार्यलाई प्राथमिकता दिन आग्रह गरेका छन् ।
प्रतिक्रिया