रुपन्देहीमा आज शोक बिदा

बुटवल । रुपन्देही जिल्लामा आज एक दिन शोक बिदा दिइएको छ । लुम्बिनी सांस्कृतिक नगरपालिकाका नगर प्रमुख सजरुद्दीन मुसलमानको असामयिक निधनप्रति सम्मान व्यक्त गर्दै जिल्ला समन्वय समिति रुपन्देहीले शोक बिदाको घोषणा गरेको हो ।

जिल्ला समन्वय समितिका उपप्रमुख रामकृपाल धोवीद्वारा जारी सूचनामा आज जिल्लाभरिका सबै स्थानीय तहका कार्यालय, शैक्षिक संस्था, संघ-संस्था तथा गैरसरकारी कार्यालयहरूमा शोक बिदा दिने उल्लेख छ । साथै, दिवंगत नगर प्रमुखप्रति सम्मान स्वरूप सबै स्थानीय तह र शैक्षिक संस्थामा राष्ट्रिय झण्डा आधा झुकाइने निर्णय गरिएको छ ।

शनिबार बिहान हृदयघातका कारण नगर प्रमुख मुसलमानको निधन भएको थियो । लामो समयदेखि स्थानीय राजनीति र सामाजिक सेवामा सक्रिय रहँदै आएका मुसलमान लोकप्रिय जनप्रतिनिधिका रूपमा चिनिन्थे । उनको निधनले रुपन्देही मात्र नभई समग्र लुम्बिनी प्रदेश नै स्तब्ध भएको स्थानीय बासिन्दाले बताएका छन् ।