काठमाडौं । नागरिक आन्दोलनका अगुवाहरुले राष्ट्रपति रामचन्द्र पौडेलसँग भेट गरी लोकतन्त्रको जग कमजोर नपार्न सरकारलाई सजग बनाउन आग्रह गरेका छन् ।
विभिन्न क्षेत्रका १४ जना प्रबुद्ध नागरिकले राष्ट्रपतिलाई ज्ञापनपत्र बुझाउँदै संक्रमणकालीन अवस्थामा राजनीतिक दल र संवैधानिक संरचनाको दायित्व अझ बढेको बताएका छन् ।
उनीहरुले जेनजी आन्दोलनपछि देखाइएको राष्ट्रपतिको अभिभावकीय भूमिकाको प्रशंसा समेत गरेका छन् । उनीहरुले सरकार निर्वाचन गराउने दायित्वबाट विमुख नहुन चेतावनी दिएका छन् ।
नागरिक अगुवाहरुले जेनजी आन्दोलनमा भएको सरकारी दमन, आपराधिक घुसपैठ र भयावह हिंसात्मक घटनाको उच्चस्तरीय छानबिनको माग पनि अघि सारेका छन् । उनीहरुले आन्दोलनलाई नियन्त्रणमा लिन सुरक्षा निकायको निष्क्रियताप्रति शंका व्यक्त गरेका छन् । दलहरुमाथि प्रतिशोध लिने वा संवैधानिक संरचनालाई असंवैधानिक ढंगले चलाउने खतरा देखिएको विश्लेषण गर्दै नागरिक अगुवाहरुले यस्तो अवस्था दोहोरिए अर्को द्वन्द्व सुरु हुन सक्ने भन्दै राष्ट्रपतिलाई सचेत समेत गराएका छन् ।
यसैबीच सरकारले विदेशमा रहेका नेपालीलाई पनि मतदानमा सहभागी गराउनेगरी अध्यादेश ल्याउने तयारी गरिरहेको प्रसंगमा नागरिक अगुवाहरुले चुनाव समयमै नहुने चिन्ता व्यक्त गरेका छन् । ६ महिनाभित्रै निर्वाचन नभए ठूलो संवैधानिक संकट आउने भन्दै उनीहरुले राष्ट्रपतिको ध्यानाकर्षण गराएका छन् ।
प्रतिक्रिया