काठमाडौं । जेनजी आन्दोलनका क्रममा पार्टी कार्यालयमा आगलागी भएको दश दिनपछि नेपाली कांग्रेसले पहिलोपटक औपचारिक बैठक गरेको छ ।
उपसभापति पूर्णबहादुर खड्काको अध्यक्षतामा शुक्रबार पार्टीको कार्यसम्पादन समिति बैठक कार्यालयमै बसेको हो । बैठकमा जेनजी आन्दोलनपछि विकसित घटनाक्रमका विषयमा छलफल भैरहेको छ । बैठकले पार्टी कार्यालय व्यवस्थापनमा पनि निर्णय गर्नेछ ।
आगोले लाइब्रेरीसहितका महत्वपूर्ण कागजात राखिएका भाग ध्वस्त भए पनि पुरानो बैठक हल सुरक्षित रहन पुगेको थियो । यही हलमा अहिले बैठक सञ्चालन भइरहेको छ ।
बैठकमा सभापति शेरबहादुर देउवासहित कार्यसम्पादन समितिका सदस्य डा. शेखर कोइराला, अर्जुननरसिंह केसीलगायतका नेताहरू भने सहभागी छैनन् । देउवा दम्पत्तिलाई भदौ २४ गते जेनजी आन्दोलनको क्रममा उनको निवासमै सांघातिक आक्रमण गरिएको थियो । अहिले उनी उपचाररत छन् ।
बैठकका निर्णय सार्वजनिक गर्न दिउँसो २ बजे पत्रकार सम्मेलन तय गरिएको पार्टीले जनाएको छ ।
प्रतिक्रिया