काठमाडौं । नेपाली कांग्रेसले संसद् विघटन गरेर नयाँ सरकार गठन गरिएको प्रक्रियाप्रति असहमति जनाएको छ।
शुक्रबार पार्टी कार्यालय सानेपामा बसेको केन्द्रीय कार्यसमितिको बैठकले संसद् विघटनलाई असंवैधानिक ठहर गर्दै त्यसप्रति आपत्ति जनाएको हो।
बैठकमा कृष्णप्रसाद सिटौला लगायतका नेताहरुले संसद् विघटन असंवैधानिक रहेकाले त्यसलाई प्रमुख मुद्दा बनाउनु पर्ने धारणा राखेका थिए । बैठकले निर्वाचन घोषणाको विरुद्धमा नजाने तर, प्रक्रियाबारे प्रश्न उठाउने र अन्य दलहरुसँग पनि छलफल गर्ने निर्णय पनि गरेको छ ।
जेनजी आन्दोलनका क्रममा ध्वस्त भएको पार्टी केन्द्रीय कार्यालयमा बचेको एक हलमा आयोजित पहिलो बैठक पार्टी उपसभापति पूर्णबहादुर खड्काको अध्यक्षतामा बसेको थियो।
यसअघि खड्काकै अध्यक्षतामा कांग्रेस कार्यसम्पादन समिति भर्चुअल माध्यमबाट बसेको थियो। आन्दोलनका क्रममा कांग्रेसका धेरैजसो शीर्ष नेताहरूको घरमा पनि क्षति पुगेको भन्दै बैठकले ती घटनाको निन्दा गर्ने निर्णय गरेको छ। सभापति देउवा जेनजी आन्दोलनकारीको सांघातिक आक्रमणमा परेर गम्भीर घाइते भएपछि अहिले उपचाररत छन् ।
बैठकले तत्काल कसैलाई पनि कार्यवाहक सभापतिको जिम्मेवारी नदिने र विशेष महाधिवेशन नगर्ने निर्णय गरेको छ। सहमहामन्त्री महेन्द्र यादवका अनुसार, कार्यवाहक र विशेष महाधिवेशनको विषय सभापति देउवा पूर्ण रूपमा स्वस्थ भएपछि मात्रै छलफल गरिनेछ।
प्रतिक्रिया