बुटवल । जेनजी आन्दोलनका क्रममा भएको क्षति पुनःनिर्माणका लागि देशभर सहयोग घोषणा भइरहेका बेला रुपन्देहीको सामाजिक र खेलकुद क्षेत्रमा सक्रिय लखन ब्रदर्श युथ क्लबले पनि राष्ट्र पुनर्निर्माण कोषमा आर्थिक सहयोग गर्ने घोषणा गरेको छ ।
आइतबार क्लबको सचिवालयमा आयोजित पत्रकार सम्मेलनमा क्लबका अध्यक्ष सुदिप खत्रीले १ लाख ११ हजार १ सय ११ रुपैयाँ सहयोग गर्ने प्रतिबद्धता जनाए । “सामाजिक कार्यमा सहभागिता, युवाहरूको प्रतिबद्धता” भन्ने नारासहित स्थापना भएको क्लब नगर सौन्दर्यीकरण, सरसफाइ, सचेतना र खेलकुद गतिविधिमा निरन्तर सक्रिय रहँदै आएको उनले जानकारी दिए ।
उनका अनुसार क्लबले सिंहदरबारसहितका क्षतिग्रस्त सरकारी संरचनाको जीर्णोद्धारमा थोरै भए पनि योगदान पुर्याउने उद्देश्यले सहयोग घोषणा गरेको हो । साथै, सरकारी कार्यालयहरूमा स्वयंसेवी श्रमदानसमेत गर्ने गरी तयारी भइरहेको उनले बताए ।
स्थापना दिवसमा स्वास्थ्य शिविर र रक्तदान कार्यक्रम आयोजना गर्दै आएको क्लबले हालसम्म आफ्नै खर्चमा सडकमा छरिएका विद्युत् र टेलिफोनका तार क्लिपिङ गर्ने, वडासँग समन्वयमा बाटाका खाल्टाखुल्टी टाल्ने, वृक्षारोपण गर्ने, डेंगुजन्य रोगबारे जनचेतना फैलाउनेजस्ता गतिविधि गर्दै आएको सचिव निरञ्जन पन्तले जानकारी दिए । साथै, क्लबले पहिलो संस्करणको लखन कप फुटबल प्रतियोगिता समेत आयोजना गरिसकेको छ ।
वि.सं. २०७९ मा दर्ता भएको यो क्लबमा हाल करिब ८० जना युवा सदस्य सक्रिय रहेका छन् ।
प्रतिक्रिया