काठमाडौं । जिल्ला प्रशासन कार्यालय काठमाडौंले नेकपा (एमाले)ले भोलि आयोजना गर्न लागेको प्रदर्शनका लागि स्वीकृति नदिने निर्णय गरेको छ ।
आज (शुक्रबार) एक सूचना जारी गर्दै प्रमुख जिल्ला अधिकारी (सीडीओ) ईश्वरराज पौडेलले सुरक्षासम्बन्धी जोखिम बढ्ने भएकाले कुनै पनि समूहलाई प्रदर्शन, र्याली वा सभा गर्न अनुमति नदिने निर्णय भएको जानकारी दिएका छन् ।
प्रशासनको सूचनामा कुनै निश्चित समूहको नाम उल्लेख गरिएको छैन । तर, भोलि काठमाडौंका विभिन्न स्थानमा मोटरसाइकल र्याली तथा सभा आयोजना गर्न लागिएको जानकारी प्राप्त भएपछि यस्तो निर्णय गरिएको प्रशासनले जनाएको छ ।
सूचनामा भनिएको छ, “अहिलेको अवस्थाको संवेदनशीलता र सुरक्षाका चुनौतीलाई मध्यनजर गर्दै र्याली, जुलुस, धर्ना, सभा र प्रदर्शनजस्ता गतिविधिले आम नागरिकको सुरक्षामा असर पार्न सक्ने भएकाले कुनै पनि समूहलाई प्रदर्शनको अनुमति दिइने छैन ।”
प्रशासनले पूर्वस्वीकृतिबिना कुनै पनि प्रकारका सार्वजनिक कार्यक्रम नगर्न वा नगराउन सबैलाई आग्रह गरेको छ ।
यसअघि नेकपा (एमाले) निकट राष्ट्रिय युवा संघले भोलि काठमाडौंमा मोटरसाइकल र्याली निकाल्ने जनाएको थियो । युवा संघका अनुसार उक्त र्याली दिउँसो १ बजे तीनकुनेबाट सुरु भई बानेश्वर, त्रिपुरेश्वर, दरबारमार्ग, कमलपोखरी, ज्ञानेश्वर, एयरपोर्ट हुँदै पुनः तीनकुनेमै सम्पन्न हुने कार्यक्रम तय गरिएको थियो ।
प्रतिक्रिया