रुपन्देहीसहित ३३ जिल्लामा बाढीको जोखिम, सतर्कता अपनाउन आग्रह

काठमाडौं । देशका विभिन्न साना तथा ठूला नदीहरूमा आगामी तीन दिन पानीको बहाव उल्लेख्य रूपमा बढ्ने सम्भावना रहेको बाढी पूर्वानुमान महाशाखाले जनाएको छ । महाशाखाले नदीतटीय क्षेत्रका बासिन्दालाई उच्च सतर्कता अपनाउन आग्रह गरेको छ ।

बिहीबार जारी विशेष बुलेटिनअनुसार ताप्लेजुङ, संखुवासभा, सोलुखुम्बु, तेह्रथुम, पाँचथर, ओखलढुंगा, खोटाङ, भोजपुर, धनकुटा, इलाम, झापा, मोरङ, सुनसरी, उदयपुर, पर्सा, बारा, रौतहट, सर्लाही, धनुषा, महोत्तरी, सिरहा, सप्तरी, सिन्धुली, रामेछाप, काभ्रेपलाञ्चोक, ललितपुर, भक्तपुर, मकवानपुर, चितवन, नवलपरासी (पूर्व-पश्चिम दुबै), रुपन्देही र कपिलवस्तुका साना नदीमा आकस्मिक बाढीको ‘मध्यम जोखिमसहित उच्च सम्भावना’ रहेको छ ।

महाशाखाले भनेको छ,

“कोसी, मधेस र वाग्मती प्रदेशका अधिकांश नदीहरूको बहाव कात्तिक १३ गते बढ्दो क्रममा रहने र १४ तथा १५ गते सतर्कता तह आसपास पुग्ने सम्भावना छ । त्यसैले नदीतटीय क्षेत्रका बासिन्दाले उच्च सतर्कता अपनाउनु आवश्यक छ ।”

हाल देशमा अरबसागरको न्यूनचापीय प्रणाली, बंगालको खाडीमा विकसित चक्रवात ‘मोन्था’ र पश्चिमी वायुको संयुक्त प्रभाव सक्रिय रहेको महाशाखाले जनाएको छ । मौसमविद्हरूका अनुसार ‘मोन्था’को प्रभाव आउँदो शनिबार बिहानसम्म रहनेछ ।

विशेषज्ञहरूले सम्भावित वर्षा र बाढीका कारण पहाडी तथा तराईका नदी किनारमा बसोबास गर्ने नागरिकलाई विशेष सतर्क रहन र जोखिम क्षेत्रबाट सुरक्षित ठाउँमा सर्न आग्रह गरेका छन् ।