काठमाडौं । बंगलादेशको एक अदालतले बंगलादेशकी पूर्वप्रधानमन्त्री शेख हसिनालाई मानवताविरुद्धको अपराधमा दोषी ठहर गरेको छ । त्यहाँको एक अदालतले सोमबार हसिनालाई मानवअधिकार विरुद्धका अपराधमा दोषी ठहर गर्दै सजाय सुनाएको समाचार संस्था रोयटर्सले जनाएको छ ।
गत वर्ष विद्यार्थी नेतृत्वमा भएको विद्रोहमाथि हसिना नेतृत्वको सरकारले गरेको घातक दमनकारी कारबाहीका बारेमा परेको मुद्दा किनारा लगाउँदै अदालतले हसिनालाई दोषी ठहर गरेको समाचारहरुमा जनाइएको छ । आन्दोलनलाई दमन गर्न हसिनाले आदेश दिएको आरोपमा चलेको मुद्दाको फैसला सोमबार सुनाइएको हो ।
हसिनासहित तत्कालीन गृहमन्त्री असदुज्जमान खान कमल र तत्कालीन प्रहरी महानिरीक्षक चौधरी अब्दुल्लाह अल मानुनलाई प्रतिवादी बनाइएको मुद्दाको अन्तर्राष्ट्रिय अपराध न्यायाधीकरण (आईसीटी)ले फैसला सुनाएको हो ।
सोमबार न्यायाधीश गुलाम मुर्तजाको नेतृत्वमा न्यायाधीशद्वय मोहम्मद अफीउल आलम महमुद र मोहम्मद मोहितुल हक एनाम चौधरीसमेत रहेको तीन सदस्यीय इजलासले उक्त मुद्दाको फैसला गरेको हो ।
इजलासले तत्कालीन प्रधानमन्त्री हसिना, तत्कालीन गृहमन्त्री र तत्कालीन प्रहरी महानिरीक्षक मिलेर प्रदर्शनकारीविरुद्ध कारबाहीको आदेश दिएको ठहर गरेको छ ।
प्रदर्शन दबाउन तथा आन्दोलनकारीलाई खोज्न तथा पहिचान गर्न तत्कालीन प्रधानमन्त्री हसिनाले सुरक्षा निकायलाई ड्रोन प्रयोग गर्न अनुमति दिएको, प्रदर्शनकारी भेला भएको स्थानमा हेलिकोप्टरबाट बम खसाल्न अनुमति दिएकोसमेत इजलासले ठहर गरेको छ ।
हसिनाको फैसलालाई लिएर देशभर हिंसा फैलन सक्ने आँकलन गर्दै सरकारले उच्च सतर्कता (हाई अलर्ट) को घोषणा गरेको छ। ढाकामा मात्र १५ हजार प्रहरी परिचालन गरिएको त्यहाँका सञ्चारमाध्यमहरुले खबर छापेका छन् । उनीहरूलाई हिंसात्मक प्रदर्शनकारीहरूमाथि गोली चलाउने आदेश दिइएको छ।
प्रतिक्रिया