चुनाव जितेर मात्र के गर्नु, जनविरोधी काम गरेपछि हेलिकोप्टरबाटै भाग्नुपर्ने रहेछ : प्रचण्ड

दाङ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले चुनाव जितेर सत्तामा पुगेपनि जनविरोधी काम गरे हेलिकोप्टरबाट भाग्नुपर्ने अवस्था आउने टिप्पणी गरेको छन् ।

शनिबार दाङको लमहीमा आयोजित लुम्बिनी प्रदेशस्तरीय एकता सन्देश कार्यक्रममा उनले बहुमतको अहंकारले देश अस्थिर बन्ने चेतावनीसमेत दिए। प्रचण्डले चुनाव जितेर दुई तिहाईको सरकारको नेतृत्व गरे पनि जनविरोधी काम गरेपछि हेलिकोप्टरबाट भाग्नुपर्ने दिन आउँदो रहेछ भन्ने कुरा बताएका हुन् । उनले पूर्वप्रधानमन्त्री एवं एमाले अध्यक्ष केपी ओलीलाई व्यंग गर्दै यस्तो टिप्पणी गरेका हुन् ।

प्रचण्डले भने, “चुनाव जितेर मात्रै केही नापिँदोरहेछ, कहिलेकाहीँ हेलिकोप्टर चढेर भाग्नुपर्ने अवस्था पनि आउँदो रहेछ। सबैभन्दा ठूलो कुरा भनेको जनता बीचको एकता रहेछ।” उनले संसदमै पनि बहुमतको दम्भ नदेखाउन आग्रह गरेको स्मरण गराउँदै वर्तमान अवस्थामा पनि त्यही समस्या देखिएको बताए। एमाले अध्यक्ष केपी शर्मा ओलीले अहिलेका घटनाहरूको दोष आफूलाई थोपरेको आरोपसमेत उनले लगाए।

प्रचण्डले पार्टीका सहसंयोजक माधव नेपालसँग आफ्नो ४० वर्षदेखिको सम्बन्ध रहेको बताए । नेपालसँगको ऐतिहासिक सहकार्यले पञ्चायत समाप्त गर्न र संघीय गणतन्त्र स्थापना गर्न टेवा पुगेको स्मरण गरे।

प्रचण्डले लामो छलफलपछि १५ वटा पार्टीबीच भएको एकतालाई जनताले उत्साहपूर्वक स्वीकार गरेको विश्लेषण गरे । देश निर्माण आन्दोलन, संघर्ष र बलिदानबाटै सम्भव हुने बताउँदै कम्युनिष्टहरू सबैभन्दा बढी राष्ट्रभक्त भएको दाबी गर्दै उनले जनयुद्धदेखि लोकतान्त्रिक आन्दोलनसम्म हजारौं सहिदको बलिदानीबाट वर्तमान परिवर्तन सम्भव भएको जिकिर गरे ।

भदौ २४ गते देशभर देखिएको हिंसात्मक गतिविधिप्रति चिन्ता व्यक्त गर्दै उनले राज्य संयन्त्र र सुरक्षा प्रणाली कति कमजोर बनेको रहेछ भन्ने त्यही घटनाले देखाएको उल्लेख गरे।