नेपालगञ्ज । गत आठ दिनअघि कर्णाली प्रदेशको जुम्लाबाट अनसन सुरु गरेका डा. गोविन्द केसीलाई काठमाडौं जानेक्रममा नेपालगन्ज आइपुगेका छन् ।
अनसनलाई कायमै राख्दै डा. केसी हेलिकोप्टरमार्फत नेपालगञ्ज पुगेका हुन् ।
जुम्लाबाट १९ औं अनसन सुरु गरेका डा. केसीको स्वास्थ्यअवस्था कमजोर बन्ने र सुरक्षा अभाव महशुस गरेपछि काठमाडौं जाने क्रममा नेपालगञ्ज पुगेका हुन् ।
सोमबार भेरी अस्पतालमा एक रात बास बसेर मंगलबार काठमाडौं जाने तयारी रहेको छ । डा. केसी भेरी अस्पतालमा पुगेको अस्पतालले पुष्टि गरेको छ ।
भेरी अस्पतालका मेडिकल सुपरीटेन्डेन्ट डा. प्रकाश थापाले डा. केसीलाई अस्पतालको क्याविनमा बस्ने व्यवस्था मिलाइएको बताए ।
भेरीमा पुगेर पनि डा. केसीले कुनै पनि प्रकारको खाना खान अस्वीकार गरेको डा. थापाले बताए । डा. केसीको स्वास्थ्य अवस्था अहिले सामान्य रहेको जानकारी दिंदै मेसु थापाले मंगलबार बिहान सम्मका लागि डा. केसी भेरीमा बस्ने र बिहान काठमाडौं प्रस्थान गर्ने जानकारी दिए ।
डा. केसीसँग उनको स्वास्थ्य अवस्थाको निगरानी गर्दै डा. प्रविण गिरी सहितको टोली पनि जुम्ला देखि नेपालगन्जसम्म पुगेको छ । नेपालगन्ज पुगेपछि बिज्ञप्ति निकाल्दै डा. केसीले स्वास्थ्य र मेडिकल शिक्षामा सुधार तथा सुशासनका लागि १९ औं सत्यग्राह गरेको बताएका छन् ।
उनले विज्ञप्तिमा सत्याग्रहको आठौं दिन पुगिसक्दा पनि मागहरु पूरा गर्न सरकारले कुनै प्रयास वा पहल नगरेको बताएका छन् ।
उनले सरकारले आफुलाई अपहरणको शैलीमा सत्याग्रह स्थलबाट जबरजस्ती अस्पतालमा सारेको आरोप लगाएका छन् ।
केसीले विज्ञप्तिमा भनेका छन्, ‘हामीले जुम्लादेखि काठमाडौंसम्म यात्रा गरेर उहींबाट सत्याग्रह जारी राख्ने निर्णय गरेका छौ ।’
प्रतिक्रिया