काठमाडौं । ओपनर फाफ डू प्लेसिस र साम हेजलेटको विस्फोटक अर्धशतकको बलमा विराटनगर किङ्ग्सले नेपाल प्रिमियर लिग (एनपीएल) मा सुदूरपश्चिम रोयल्सलाई ६ विकेटले पराजित गर्दै पहिलो क्वालिफायरमा स्थान सुनिश्चित गरेको छ ।
यस जितसँगै विराटनगरले आगामी पहिलो क्वालिफायरमा सुदूरपश्चिमसँग नै पुनः भिडन्त पक्का गरेको छ । सात खेलमा १२ अंकसहित सुदूरपश्चिम शीर्ष स्थानमा रहँदा १० अंक बटुलेको विराटनगर दोस्रो स्थानमा उक्लिएको छ ।
शनिबार कीर्तिपुरस्थित त्रिवि क्रिकेट रंगशालामा सुदूरपश्चिमले दिएको १४८ रनको लक्ष्य विराटनगरले ११.५ ओभरमै ४ विकेटको क्षतिमा सहजतापूर्वक पूरा गर्यो । क्वालिफायर प्रवेशका लागि १३.४ ओभरभित्र लक्ष्य पूरा गर्नुपर्ने समीकरण विराटनगरले झनै सहज बनायो ।
विराटनगरको जितका नायक दुवै ओपनर रहे । डू प्लेसिसले मात्र २० बलमा पाँच चौका र चार छक्कासहित ५० रन बनाए । उनले १९ बलमै अर्धशतक बनाएका थिए, जुन एनपीएल दोस्रो संस्करणको सबैभन्दा छिटो अर्धशतक बनेको छ । यसअघि यो रेकर्ड काठमाडौँ गोर्खाजका भीम सार्कीको नाममा थियो, जसले पोखरा एभेन्जर्सविरुद्ध १९ बलमै अर्धशतक बनाएका थिए ।
अर्का ओपनर हेजलेट पनि समानरूपमा आक्रामक रहे । उनले २७ बलमा ५१ रन जोड्दै तीन चौका र चार छक्का प्रहार गरे । यी दुईले पहिलो विकेटका लागि ७.१ ओभरमा ९७ रनको पावर-पार्टनरसिप निर्माण गर्दै विराटनगरलाई विजयी आधार दिलाए ।
यसअघि टस हारेर ब्याटिङमा आएको सुदूरपश्चिमले २० ओभरमा ६ विकेट गुमाएर १४७ रनको प्रतिस्पर्धात्मक स्कोर बनाएको थियो । आरिफ सेखले ३२ बलमा एक चौका र तीन छक्कासहित ४५ रन बनाए । इशान पाण्डेले ३८, जस ब्रोनले २४, कप्तान दीपेन्द्र सिंह ऐरीले १९ र विनोद भण्डारीले १५ रन जोडे ।
विराटनगरका बलरमध्ये सन्दीप लामिछाने सर्वाधिक सफल रहे । ४ ओभरमा २० रन खर्चिँदै तीन विकेट हात पारे । प्रतिश जीसीले दुई तथा बसिर अहमेदले एक विकेट लिएका थिए ।
एनपीएलको पहिलो क्वालिफायर मंगलबार हुने तालिका छ ।
प्रतिक्रिया