बुटवल । बुटवलमा सम्पन्न सातौँ राष्ट्रपति रनिङशिल्ड प्रतियोगिता २०८२ को उपाधि कालिका मानवज्ञान माध्यमिक विद्यालयले चुमेको छ । सोमबार सम्पन्न प्रतियोगिताको अन्तिम दिनसम्म आइपुग्दा कालिकाले कुल १३ स्वर्ण, १० रजत र ५ कास्य पदक जित्दै लगातार उपाधि हात पार्न सफल भएको हो ।
प्रतियोगितामा न्यू होराइजन इङ्लिस बोर्डिङ स्कुलले १२ स्वर्ण, ३ रजत र ४ कास्य पदकसहित दोस्रो स्थान हासिल गरेको छ भने गार्गी एकेडेमीले ६ स्वर्ण, ७ रजत र ७ कास्य पदक जित्दै तेस्रो स्थानमा सीमित भयो ।
प्रतियोगिताको समापन समारोहमा बुटवल उपमहानगरपालिकाका उपप्रमुख सावित्रादेवी अर्याल, वडा अध्यक्ष हरिप्रसाद श्रेष्ठ, नगर खेलकुद विकास समितिका संयोजक बोनिन पिया लगायतले विजयी खेलाडी तथा विद्यालय प्रतिनिधिहरूलाई पुरस्कार वितरण गरे ।
समापन समारोहलाई सम्बोधन गर्दै उपप्रमुख अर्यालले विद्यालयस्तरबाटै खेलकुदको विकास गर्दै विद्यार्थीको सर्वाङ्गीण विकासमा जोड दिन आवश्यक रहेको बताइन् । बुटवल उपमहानगरपालिकाले खेलकुद पूर्वाधार विकास र प्रतिभा पहिचानमा निरन्तर लगानी गर्दै आएको उनको भनाइ थियो ।
उपाधि विजेता कालिका मानवज्ञान माध्यमिक विद्यालयलाई नगद २० हजार रुपैयाँ, रनिङशिल्ड, कप, मेडल तथा प्रमाणपत्र प्रदान गरिएको थियो ।
यस्तै, दोस्रो स्थान हासिल गरेको न्यू होराइजन इङ्लिस बोर्डिङ स्कुललाई नगद १५ हजार रुपैयाँ तथा तेस्रो भएको गार्गी एकेडेमीलाई नगद १० हजार रुपैयाँसहित कप, मेडल र प्रमाणपत्र प्रदान गरिएको थियो ।
उक्त प्रतियोगितामा विभिन्न विद्यालयका विद्यार्थी खेलाडीहरूले एथ्लेटिक्स, टिम तथा व्यक्तिगत खेलहरूमा प्रतिस्पर्धा गर्दै आफ्नो खेल प्रतिभा प्रस्तुत गरेका थिए ।
प्रतियोगिताले विद्यालयस्तरमा खेलकुदप्रति आकर्षण बढाउनुका साथै नयाँ प्रतिभा पहिचानमा महत्वपूर्ण भूमिका खेलेको आयोजकले बताएका छन् ।
प्रतिक्रिया