काठमाडौं । काठमाडौंको मुलपानी क्षेत्रबाट प्रहरीले गोली प्रहार गर्दै लुटपाटमा संलग्न १० जनालाई पक्राउ गरेको छ । रातिको समयमा सर्वसाधारणलाई पछ्याएर गहना, नगद तथा अन्य बहुमूल्य सामग्री लुट्ने गिरोह सक्रिय भएपछि जिल्ला प्रहरी परिसर काठमाडौंको टोली परिचालन गरिएको थियो ।
जिल्ला प्रहरी परिसर काठमाडौंका डीएसपी कौशल बुढाथोकीका अनुसार पछिल्ला दिनहरूमा मुलपानी आसपासका क्षेत्रमा रातिको समयमा लुटपाटका घटना बढेपछि विशेष निगरानी तथा अपरेसन सञ्चालन गरिएको थियो । सोही क्रममा गएराति प्रहरीले लुटपाटमा संलग्न १० जनालाई पक्राउ गर्न सफल भएको हो ।
प्रहरीका अनुसार पक्राउ गर्ने क्रममा आरोपितहरूले भाग्ने प्रयास गरेपछि स्थिति नियन्त्रणमा लिन गोली चलाउनु परेको डीएसपी बुढाथोकीले जानकारी दिए । यद्यपि, घटनामा कसैलाई गम्भीर चोट नलागेको प्रहरीले जनाएको छ ।
पक्राउ परेकाहरूले रातिको समयमा एक्लै हिँडिरहेका व्यक्तिलाई पछ्याएर डरत्रास देखाई गहना, नगद तथा अन्य सामग्री लुट्ने गरेको प्रारम्भिक अनुसन्धानबाट खुलेको छ । प्रहरीले उनीहरूबाट केही शंकास्पद सामग्री समेत बरामद गरेको जनाएको छ ।
प्रहरीले उक्त समूहबाट पीडित भएका व्यक्ति भए सम्पर्कमा आउन आग्रह गरेको छ । साथै, घटनासँग सम्बन्धित थप विवरण र अनुसन्धानको निष्कर्ष पछि सार्वजनिक गरिने जनाएको छ ।
प्रहरी प्रशासनले काठमाडौं उपत्यकामा रात्रीकालीन सुरक्षा सतर्कता बढाइएको र यस्ता आपराधिक गतिविधिमा संलग्नमाथि कडा कारबाही गरिने चेतावनी दिएको छ ।
प्रतिक्रिया