काठमाडौं । आईसीसी टी-२० विश्वकपअन्तर्गत समूह ‘ए’को खेलमा पाकिस्तानले लगातार दोस्रो जित हात पारेको छ । मंगलबार राति सम्पन्न खेलमा पाकिस्तानले अमेरिकालाई ३२ रनले पराजित गरेको हो ।
टस जितेर पहिले ब्याटिङ गरेको पाकिस्तानले निर्धारित २० ओभरमा ९ विकेट गुमाउँदै १९० रनको प्रतिस्पर्धात्मक योगफल तयार पारेको थियो । १९१ रनको लक्ष्य पछ्याएको अमेरिकाले २० ओभरमा ८ विकेट गुमाउँदै १५८ रन मात्र बनाउन सक्यो ।
पाकिस्तानका लागि ओपनर साहिबजादा फरहानले विष्फोटक ब्याटिङ गर्दै ४१ बलमा ६ चौका र ५ छक्काको मद्दतमा सर्वाधिक ७३ रन बनाए । बाबर आजमले ३२ बलमा ४६ रनको योगदान दिँदा सादाब खानले १२ बलमा ३० रनको तीव्र पारी खेले ।
अमेरिकाका बलर श्याड्ली भान शाल्कवाइकले उत्कृष्ट प्रदर्शन गर्दै चार विकेट लिए ।
जवाफमा अमेरिकाका लागि शायन जायागिरले ४९ रन बनाउँदा शुभम रञ्जानेले अर्धशतकीय पारी खेले । मिलिन्दु कुमारले २९ रन जोडे पनि अन्य ब्याट्सम्यानले उल्लेख्य योगदान दिन सकेनन् । पाकिस्तानका उस्मान तारिकले तीन विकेट लिएर अमेरिकाको इनिङ्स दबाबमा राखे ।
यस जितसँगै पाकिस्तान चार अंकसहित समूह ‘ए’को शीर्ष स्थानमा उक्लिएको छ । एक खेल खेलेको भारत दुई अंकसहित दोस्रो स्थानमा छ भने दुई खेलबाट एक जित र एक हार व्यहोरेको नेदरल्यान्ड्स दुई अंकसहित तेस्रो स्थानमा छ । नामिबिया र अमेरिका अंकविहीन छन् ।
समूह ‘ए’मा पाकिस्तान, भारत, नेदरल्यान्ड्स, नामिबिया र अमेरिका सहभागी छन् ।
प्रतिक्रिया