काठमाडौं । राष्ट्रिय स्वतन्त्र पार्टी (रास्वपा)ले पोखरामा आयोजना गर्ने भनिएको चुनावी सभा पनि स्थगित गरेको छ। यसअघि फागुन ९ गते भैरहवामा तय गरिएको सभा पनि स्थगित गरिएको थियो।
रास्वपाले फागुन १० गते पोखरामा आयोजना गर्ने कार्यक्रम हालका लागि स्थगित गरिएको सहप्रवक्ता प्रतिभा रावलले जानकारी दिएकी छन्।
“राष्ट्रिय स्वतन्त्र पार्टीद्वारा फागुन ९ (भैरहवा) र फागुन १० (पोखरा) मा आयोजना गरिएको पार्टी सभापति रवि लामिछाने र वरिष्ठ नेता बालेन्द्र शाहज्यूको जनसम्बोधन कार्यक्रम विशेष कारणले हालका लागि स्थगित गरिएको जानकारी गराइन्छ,” रावलले विज्ञप्तिमार्फत भनेकी छन्।
पार्टीले सभा स्थगनको स्पष्ट कारण भने खुलाएको छैन। तर पछिल्ला दिनहरूमा विभिन्न स्थानमा देखिएका राजनीतिक तनावबीच कार्यक्रम स्थगन गरिएको हो कि भन्ने चर्चा सुरु भएको छ।
यसैबीच, दाङमा रास्वपाका कार्यकर्ताले एमालेको चुनाव चिन्ह अंकित झण्डा जलाएको तथा अछाममा नेकपाको चुनावी सभा विथोल्न प्रयास गरेको घटनाप्रति एमाले र नेकपाले आपत्ति जनाएका छन्। दुवै दलले यस्ता गतिविधि तत्काल नरोकिए प्रतिकार गर्ने चेतावनी दिएका छन्।
निर्वाचन नजिकिँदै जाँदा दलहरूबीच आरोप–प्रत्यारोप र तनाव बढिरहेका बेला रास्वपाले लगातार दुई स्थानका सभा स्थगित गरेपछि राजनीतिक वृत्तमा यसलाई चासोका साथ हेरिएको छ।
प्रतिक्रिया