तोलामा ३२ सयले बढ्यो सुनको मूल्य, चाँदीको कति पुग्यो ?

काठमाडौं । नेपाली बजारमा सुनको मूल्य सोमबार पनि उकालो लागेको छ। नेपाल सुनचाँदी व्यवसायी महासंघका अनुसार आज सुनको भाउ प्रतितोला ३२ सय रुपैयाँले वृद्धि भएको हो।

अघिल्लो दिन नै तोलामा ५६ सय रुपैयाँले बढेर तीन लाख १० हजार ३०० रुपैयाँ पुगेको सुनको मूल्य सोमबार थप बढेर प्रतितोला तीन लाख १३ हजार ५०० रुपैयाँ कायम भएको छ। यस अनुसार आज उपभोक्ताले एक तोला सुन खरिद गर्न तीन लाख १३ हजार ५०० रुपैयाँ खर्च गर्नुपर्नेछ।

यस्तै, चाँदीको मूल्यमा पनि वृद्धि देखिएको छ। चाँदी प्रतितोला १७० रुपैयाँले बढेर पाँच हजार ५९५ रुपैयाँ पुगेको महासंघले जनाएको छ। आइतबार चाँदी पाँच हजार ४२५ रुपैयाँमा किनबेच भएको थियो।

अन्तर्राष्ट्रिय बजारको प्रभावसँगै स्थानीय बजारमा पनि सुनचाँदीको मूल्य निरन्तर उकालो लागिरहेको छ।