काठमाडौं । आईसीसी टी-२० विश्वकप २०२६ अन्तर्गत सुपर-८ चरणमा आइतबार दुई महत्वपूर्ण खेल हुँदैछन् । समूह ‘दुई’बाट इंग्ल्यान्ड राष्ट्रिय क्रिकेट टोली र न्युजिल्यान्ड राष्ट्रिय क्रिकेट टोली सेमिफाइनलमा प्रवेश गरिसकेपछि अब समूह ‘एक’बाट अन्तिम चारमा पुग्ने अर्को टोलीको टुंगो लाग्न बाँकी रहेको हो ।
समूह ‘एक’बाट दक्षिण अफ्रिका राष्ट्रिय क्रिकेट टोली यसअघि नै सेमिफाइनलमा स्थान सुरक्षित गरिसकेको छ । अब आइतबार साँझ हुने भारत राष्ट्रिय क्रिकेट टोली र वेस्ट इन्डिज राष्ट्रिय क्रिकेट टोलीबीचको खेलको विजेताले सेमिफाइनलमा स्थान बनाउनेछ भने पराजित टोली प्रतियोगिताबाट बाहिरिनेछ ।
भारत र वेस्ट इन्डिजबीचको खेल आइतबार साँझ ७ः१५ बजे इडेन गार्डेन क्रिकेट मैदानमा सुरु हुनेछ । आयोजक भारतका लागि यो खेल प्रतिष्ठाको लडाइँका रूपमा रहेको छ भने उत्कृष्ट लयमा रहेको वेस्ट इन्डिज भारतलाई पराजित गर्दै सेमिफाइनलमा पुग्ने लक्ष्यमा रहेको छ ।
त्यसैगरी, आजै दिउँसो ३ः१५ बजे जिम्बावे राष्ट्रिय क्रिकेट टोली र दक्षिण अफ्रिकाबीच पनि प्रतिस्पर्धा हुँदैछ । यो खेल दिल्लीमा आयोजना हुनेछ । दक्षिण अफ्रिका सेमिफाइनलमा पुगिसकेको र जिम्बावे प्रतियोगिताबाट बाहिरिसकेकाले यस खेलभन्दा भारत र वेस्ट इन्डिजबीचको खेलप्रति दर्शक र क्रिकेट समर्थकको बढी चासो देखिएको छ ।
२० राष्ट्र सहभागी प्रतियोगितामा आयोजक भारतसहित श्रीलंका राष्ट्रिय क्रिकेट टोली, जिम्बावे, वेस्ट इन्डिज, दक्षिण अफ्रिका, पाकिस्तान राष्ट्रिय क्रिकेट टोली, इंग्ल्यान्ड र न्युजिल्यान्ड सुपर-८ चरणमा पुगेका थिए । अब समूह ‘एक’को अन्तिम खेलपछि सेमिफाइनल समीकरण पूर्ण हुनेछ ।
प्रतिक्रिया