काठमाडौं । काठमाडौं जिल्ला अदालतले पूर्वप्रधानमन्त्री तथा नेकपा एमालेका अध्यक्ष केपी शर्मा ओली र पूर्वगृहमन्त्री तथा नेपाली कांग्रेसका नेता रमेश लेखकलाई थप पाँच दिन हिरासतमा राखेर अनुसन्धान गर्न प्रहरीलाई अनुमति दिएको छ।
यसअघि अदालतले चैत १९ गते दुई दिन थुनामा राखेर अनुसन्धान गर्न आदेश दिएको थियो।
भदौ २३ र २४ गते भएको जेन–जी आन्दोलनका क्रममा भएको दमनबारे जाँचबुझ गर्न पूर्वन्यायाधीश गौरीबहादुर कार्कीको नेतृत्वमा गठित आयोगले दिएको सिफारिसका आधारमा प्रहरीले चैत १४ गते शनिबार बिहानै ओली र लेखकलाई पक्राउ गरेको थियो ।
सो पक्राउ गैरकानूनी भएको दाबी गर्दै ओली पत्नी राधिका शाक्य र लेखक पत्नी यशोदा लेखकले चैत १५ गते सर्वोच्चमा दायर गरेको बन्दी प्रत्यक्षीकरणको मुद्दाको सुनुवाइ भने जारी छ । आज सुनुवाइ नसकिएपछि रिटलाई हेर्दाहेर्दैमा राखिएको छ ।
ओली हाल त्रिवि शिक्षण अस्पतालमा प्रहरी सुरक्षा घेराभित्र उपचार गराइरहेका छन् भने लेखकलाई दुई नम्वर गण महाराजगन्जमा राखिएको छ ।
प्रतिक्रिया