खजुरा । बाँकेको खजुरा गाँउपालिका ३ खजुरा बजारमा सञ्चालनमा रहेको खजुरा खानेपानी उपभोक्ता समितिको निर्वाचनमा दलीय गठबन्धनलाई पराजित गर्दै अध्यक्ष पदमा स्वतन्त्र उम्मेदवार तोगराज गिरी प्यानल सहित विजयी भएका छन् ।
सोही खानेपानी आयोजनामा लामो समय प्राविधिक कर्मचारीकारुपमा काम गरेका गिरी भारी मतका साथ अध्यक्ष पदमा विजयी भएका हुन् । उनले ३८५ मत पाउँदा उनका प्रतिद्वन्द्वी श्रवणधीर केसीले १२२ मत प्राप्त गरेका छन् । उपभोक्ता समितिको उपाध्यक्षमा गिरी प्यानलका हरिप्रसाद विक ३२१ मतका साथ विजयी हुँदा उनका प्रतिस्पर्धी इन्द्रबहादुर खत्रीले १८५ मत पाएका छन् ।
त्यसैगरि सचिव पदमा गिरी प्यानलकै तिर्थराज सुबेदीले ३४९ मतका साथ विजयी भएका छन् । उनका निकटतम प्रतिद्वन्द्वी किरण कुमार केसीले १६१ मत पाएका छन् । कोषाध्यक्ष पदमा पनि गिरी प्यानलबाट छम बहादुर बोहराले ३३८ मतका साथ चुनाव जितेका छन् । उनका प्रतिस्पर्धी धनराज कार्कीले १६५ मत पाएका छन् ।
सदस्यहरुमा राधीका न्यौपाने (३५१), दीपक सुबेदी(३४९), रामप्रसाद शर्मा आचार्य (३४३), सुजाता घर्तीमगर(३३७), विनय गुप्ता (३४३), नरबहादुर गुरुङ (३३६) र सविता रेग्मी क्षेत्री (३३५) विजयी भएका छन् ।
गिरी प्यानलका विरुद्ध नेपाली कांग्रेस, नेकपा एमाले र राप्रपाले गठबन्धन गरेर प्यानल उठाएको थियो । खानेपानी निर्वाचनमा नेपाली कम्युनिष्ट पार्टीले भने सहभागिता जनाएको थिएन । दलीय प्यानललाई जिताउन निर्वाचनमा आज बिहानैदेखि दलका जिल्ला नेताहरुले उपभोक्ताहरु माझ सक्रिय चलखेल गरिरहेका थिए ।
१०१४ उपभोक्ता रहेको खजुरा खानेपानीमा ८५८ जना उपभोक्ताले मात्र नियमीत महशुल बुझाएर मताधिकार सुरक्षित गरेका थिए । कुल खसेको ५३६ मतमा ७ वटा मत बदर भएको निर्वाचन समितिले जनाएको छ ।
प्रतिक्रिया